上季四大皆空的南華噚日正式開操，而過往南華開操多數都會由南華體會高層主持拜神同切燒豬儀式，場面墟冚，不過，噚日正式開操，既冇任何一位南華會高層到場，足主羅傑承亦冇蒲頭，新加盟嘅職球員影完張相，之後總教練廖俊輝同球員訓話，就隨即開操。
其實南華上星期已經非正式開操，不過，唔知點解玩神秘，玩閉門之餘，仲要出動到「實Q」驅趕專程到場採訪嘅傳媒；我求大俠睇本地波咁多年，都未見過有球會開操玩閉門，仲要出動保安趕記者咁誇張。噚日正式開操，少林寺嘅寺門終於大開，不過，傳統開操儀式又唔見晒，得番球員差不多全程齋跑。
羅生：開會唔得閒
南華足主兼足總副主席羅傑承，噚日夜晚主持完甲組會後就話，因為開會唔得閒，所以下午冇去睇操練；但朝早已經同教練開咗會，中午同球員食自助餐。至於拜神同切燒豬，可能要等球隊集訓完先喎！而羅生亦好大方咁承認，今季確實會縮皮，班費由上季2,000萬港元減到1,700萬左右，而目標係重奪聯賽冠軍，最大對手會係傑志。
問到教練廖俊輝點解肯再做南華教練，輝哥話，其實好多朋友都問過呢個問題，佢好坦白講：「本來可以留喺足總舒舒服服帶代表隊，但人就係咁，鍾意接受挑戰；難得南華畀機會，喺南華多年，見成績唔好都唔開心，球會今屆銳意年輕化，希望可以幫到球隊爭到好成績。」
晨曦逐出甲組行列？
講番足總甲組會，噚日再同nowTV代表傾新一季港甲頻道；羅生會後話由於nowTV提供折扣，加埋傾緊嘅聯賽贊助商已經同意將過百萬港元嘅贊助費，用喺港甲頻道，令到甲組會每月負擔嘅轉播費可能減半。不過，據聞晨曦堅持唔加入，有董事計劃動議，喺下個月董事會入面提出，必須加入轉播計劃先畀踢甲組，實行逼晨曦就範。我求大俠就睇吓晨曦係咪堅持落去啦！此外，甲組會仲落實新一屆聯賽實施三升一降制度，即係話遲下甲組隊，會有12支球隊參與，拍得住蘇超囉！另外，銀牌和足總盃亦採主客兩回合淘汰制。
