蘋機會：HD魚雷　10米潛拍1080p

一般數碼相機、攝錄機大多數都係四四方方，新意欠奉，想出位，自然要搞吓新意思。好似眼前Rollei呢部水中攝錄機，完全突破傳統外形，十足一粒魚雷，有型非常。加上佢擁有10米深潛能力，兼備1080p高清拍攝，呢枚高清魚雷，破壞力的確唔嘢少。

記者：韓繼聰
攝影：蔡家輝、潘志恆
模特兒：Paris@PureModels

金屬子彈　170°高清廣角

第一眼望見呢支BulletHDPro，真係想像唔到係部高清攝影機。外殼以堅硬鋁合金製作，同佢嘅子彈外形相當配合，防震防撞，就算喺1.2米咁高掉落地都唔會出事。不過講到強項當然係落水喇，叫得佢做魚雷，防水能力達10米深潛，一般浮潛睇魚，夠應付有餘。加上佢身形超輕巧，只有104mm長、104g重，同一般電筒仔差不多，落水拍嘢好就手。
水中實試，佢嘅2,000萬像素鏡頭質素算唔錯，水底影相拍片都相當清駡。更特別欣賞佢嘅170°超廣角鏡頭，雖少不免有變形情況，但勝在夠Wide，拍出嚟嘅影像震撼有力。不過講到操作上就有少少彈，無芒睇唔到自己拍咗啲乜，所有設定掣更處於防水殼內，落水前就要選定影相定拍片，靈活性唔多足夠囉。

有成10米防水，兼且夠輕巧！

■170°視角鏡頭，拍攝水底廣闊環境一流。

■卡位及設定掣均在尾蓋，落水前要Set定。

■全機只有一個外露掣作拍攝，操作方便簡單。

■落水前要套膠圈及塗上防水油，有啲煩。

RolleiBulletHDPro1080p（$2,420/a）
■2,000萬像素，1080p拍片，10米防水，1.2米防撞，microSD卡，內置電

60米超級潛航

一部玩外形，另一部就玩實際。Bullet4S雖然一樣有「子彈」名字，但外形就走番傳統路線。外形無驚喜，但潛力就嚇親你，配上潛水膠殼，Bullet4S即可深潛至60米水底，比市面一般防水機都強好幾個Level，攞住佢玩水肺潛水都NoProblem。而操作方面4S亦比HDPro方便及多選擇，首先4S設有可裝可拆顯示器，係就係細啲，但至少知自己拍緊乜，當要裝喺頭盔玩實拍時，又可拆芒減輕重量。
拍攝上4S備有比魚雷更Wide嘅175°視角，用家亦可按需要調校127°或90°較窄視角，減低相片變形幅度。最重要係即使裝上潛水殼，仍可隨時揀拍片定影相模式，靈活性大好多。不過要留意，雖然拍攝同樣達1080p，但影相就只得800萬像素，想影超高解像水底相片就差少少喇。