阿仙奴喺禮拜六就會出發嚟亞洲踢3場季前熱身賽，香港球迷最關心嘅，梗係尹佩斯（RVP）會唔會隨隊嚟踢29號對傑志場友賽啦；而我求大俠有信心RVP多數都會嚟，亞洲球迷大可放心！
今日歸隊進行操練
早排宣佈唔會同阿仙奴續約嘅尹佩斯，喺禮拜一就會歸隊進行操練，備戰下月18號展開嘅英超新球季。而兵工廠喺禮拜六展開亞洲之旅，頭一站係大馬，之後去中國嘅北京同埋香港打多兩場，包括想鬥簽尹佩斯嘅曼城。雖則尹佩斯決定唔續約，但佢份合約仲有12個月，家陣佢嘅身份仲係槍手；而且，呢位28歲嘅荷蘭國腳前鋒亦係阿仙奴今次亞洲之旅嘅最大賣點。除非佢喺嚟緊呢幾日練習重創，搞到要留喺倫敦養傷，否則喺禮拜六一定要上機。
消息人士亦都指出，就算盛傳對尹佩斯好有興趣嘅曼城喺呢個星期出手，亦未必阻止到尹佩斯去參加亞洲之旅。阿仙奴講到明，至少要2,000萬鎊（約2.4億港元）先有得傾，但曼城最初嘅開價只係1,500萬鎊，睇嚟仲有排拉鋸。查實喺上季，拿斯尼都係咁嘅case；早喺暑假已傳佢會走人，但佢都有參加阿仙奴嘅季前集訓，仲喺對利物浦場嘅英超上陣，之後先喺8月24號過檔曼城。照咁睇，尹佩斯單轉會應該有排搞，買咗飛入大球場睇阿仙奴嘅球迷，應該可以放心！
阿仙奴捧盃新季好開始
另外，阿仙奴前晚喺聖瑪莉球場舉行嘅MarkusLiebherr紀念盃，同修咸頓打成1:1（比賽時間係45分鐘），互射12碼雖然輸4:5；但因為之前贏咗安德列治1:0，結果兵工廠以1勝1和成績捧盃，喺新球季開波之前先攞個盃仔。話時話，佢哋都算有盛意，佐羅、安德里山度士、謝雲奴、蘭斯貝利同埋高基連等都有踢，個陣都ok㗎！
