回復單身的荷李活巨星湯告魯斯（TomCruise），前日在冰島拍攝新片《Oblivion》，並不避嫌地與早前傳出緋聞的前邦女郎奧嘉古莉寧高（OlgaKurylenko）拍攝咀戲。今次是靚佬湯婚變後首個大銀幕啜嘴鏡頭，但他表現得無福消受，似乎仍為今後少了時間與寶貝女Suri見面而不悅。
靚佬湯與姬蒂荷姆絲（KatieHolmes）早前簽訂離婚協議，他被分走至少2,500萬英鎊（約3億港元）身家固然傷元氣，但最傷莫過於他今後不能日日見住6歲囡囡Suri。前日靚佬湯在冰島繼續為科幻新片《Oblivion》開工，之前有傳他火速撻着拍檔奧嘉治情傷，兩人在片場內手拖手，但後來有指緋聞純粹煲水，事關女方已有男友。
養子女探班
開拍以來靚佬湯與奧嘉拍攝的戲份，都沒有親密身體接觸，不過前日終拍到戲肉，兩人正式錫錫！今次是靚佬湯變回寡佬後首拍咀戲，雖然面對美女獻吻及大晒美腿誘惑，但靚佬湯表現並不享受，未有雙手攬實對方回禮，相信與他跟心肝椗Suri減少了見面時間有關。
靚佬湯與奧嘉之後轉到旁邊搭建的太空船拍另一組鏡頭，靚佬湯抱她走出太空船，表現吃力。到昨日電影煞科，靚佬湯獲一對養子女Connor和Isabella現身探班，令他展露難得笑容。
Suri睇狗喊
至於靚佬湯的掌上明珠Suri，近日繼續與母親姬蒂在紐約去街，姬蒂約了人傾公事，放低Suri前帶她去寵物店睇狗仔，豈料當店員拿出兩隻狗仔時，攬慣玩具狗的Suri卻扁嘴喪喊，似乎害怕接觸真狗。