蘋機會：鬼Game消暑　越玩越心寒

天氣又悶又熱，開盡冷氣都硬係無料到，反而早前嘅惡搞影鬼Apps為大家增添不少寒氣。今日推介三款驚慄遊戲，打頭陣高清重製嘅《零：真紅之蝶》，加鬼加結局不特止，配合Wii手掣扮相機玩法，逼你不時舉手掣「影鬼」，又確係將恐怖Game推高一層次。

記者：許福合
攝影：陳盛臣
Model：Kimberley@PureModels

高清畫面更嚇人

講起恐怖遊戲，不計喪屍類，單靠氣氛嚇人的殿堂級遊戲，《零》系列一定係首選，而《紅之蝶》由兩位雙胞胎姊妹任主角，挑戰玩家膽量極限，口碑甚佳。新作《真紅之蝶》雖然內容故事採用原著，但圖像及角色都經過重製，視覺效果可以話由標清變高清，畫面更真實，氣氛自然更加嚇倒人！畫面雖然升呢到高清，不過同上一集一樣，畫面太黑太暗，有時連移動都有困難，最後為求玩得順暢，都係略微調光電視去玩。
在Wii上推出，當然加入體感支援，玩起來操作會比上集更佳，尤其係玩家視點更加直覺式，不知不覺就已投入進《零》的世界。

■以Wii體感操控，玩落更逼真更投入。

■畫面經過重製，高清後更嚇倒人。

■最正是遊戲氣氛，加上配樂，未玩先驚。

■肉眼乜都見唔到，一舉相機班衰鬼就現晒形。

最愛門後嚇鬼

同一般動作遊戲不同，《零》的節奏較慢，但每每在最不為意時嚇你一跳。例如靈體總喜歡在開門時毫無預兆地突然現身，一個人夜晚玩你都咪話唔驚！兩姊妹在Wii上，仍然係拎住部相機就夠照，遇到鬼怪拿起相機拍照就可將鬼魂攝走。操作方面因為用Wii手掣，拿起手掣向畫面就可拍攝，擬真度就更高、更快更準。另外，更因應Wii版而新增鬼屋模式，左下角會顯示控制器的震動幅度，用以判定玩家的受驚程度，鬼魂出現的時間與位置都會不同，令耐玩性增加不少。上集《紅之蝶》因應玩家的決定會有不同結局，新作會再加上一些新Ending，完全可當作新Game來玩。