曼聯喺星期日公佈咗去南非同埋中國進行熱身賽嘅22人大軍名單，朗尼同迪基亞呢班有份踢歐國盃嘅大國腳同奧運腳都不在陣中，星味無疑係爭啲，反而唔等使廢柴就唔少。想走但走唔到嘅貝碧托夫、唔爭氣嘅路爾斯安達臣加埋「驚典收購」碧比；南非同中國球迷隨時見到幾個有心無力、甚至冇心同冇力嘅紅魔球員獻技。
香川處子登場定搏命
朗尼同菲爾鍾斯等一班出戰歐國盃嘅國腳仍然未歸隊，另外4名有份踢奧運嘅球員，加埋傷兵基斯史摩寧同埋莊尼伊雲斯，全部都唔會隨曼聯去非洲同亞洲。不過里奧費迪南、史高斯同香川真司等都喺名單內，其中香川有望第一次為曼聯披甲，肯定搏命。紅魔鬼熱身賽之旅第一站係去南非嘅德班，22人大軍已經喺星期一出發，準備喺星期三同當地球會阿馬祖路交手，呢場波足智彩都有開盤。
領隊費格遜喺上季完結之後，講到明會賣走貝碧托夫，但過咗成兩個月都一路冇聲氣。呢位31歲前鋒都坦言留喺曼聯如坐針氈：「我份人唔鍾意估估吓，我睇到報紙寫話曼聯將我叫價1,000萬鎊，所以就搵費Sir傾吓，佢話其實收500萬鎊就會放人，你信邊個呢？我只係想有得落場比賽，既然喺度冇乜機會，講拜拜都不失為好事。之不過如果最後係要留低，我都會保持番專業態度嘅。」500萬鎊都冇人吼，我求大俠認為貝碧要走人，睇怕都要放下身段喺人工要求上減吓價先得。家貝碧只係諗住走人，睇怕嚟到南非都冇乜心機去踢波。
安達臣碧比蹉跎歲月
除咗貝碧外，07年以2,500萬鎊由波圖加盟，但至今都幾乎冇腳好波嘅路爾斯安達臣，就聲言要喺來季踢出身價。之不過我求大俠收到風曼聯都搵緊買家接收呢個失敗收購，睇嚟都係信佢唔過。講到曼聯買人失誤，近年最經典嘅肯定係2010年無端端用740萬鎊收購咗碧比返嚟。據講費Sir睇都未睇過佢踢波，加盟後見唔對路喺上季借去土耳其比錫達斯。碧比去到嗰邊因為受傷幾乎冇踢過，蹉跎一年後已經返嚟曼聯。費Sir希望佢喺熱身賽生生性性，話唔埋會有水魚接手，但我求大俠就唔多睇好咯。