蘇寧上周五發咗個盈警，估計上半年純利要同比跌20%至30%。市場原本覺得家電業第二季生意會好啲，點知比首季時跌15%仲差。那些相信新補貼政策可以幫到大忙嘅人，可以收埋把口。
蘇寧噚日臨近收市已經跌到停板，連累埋A股百貨股都大插水。國美（493）近年因為內耗，無論係進入三、四線城市，還是發展電子商貿，都慢蘇寧幾拍。國美雖然現價已經係破產價，但要等一個可以夾淡倉的catalyst，已經等到大家死晒心。
人人都話搞網上購物係家電業嘅未來，但到底呢門生意有幾多係搵到新錢，幾多只係分攤了店舖的銷售呢？就算你唔想大搞，人哋都會做，好似網店京東商城，早已經搶咗國美好多生意，所以係時勢焗你要跟。
有分析員就曾經同海迪分析，國美可以向家電生產商直接攞貨，比起京東商城要問批發商攞，margin爭一截，仲係有一定競爭力。只係海迪擔心，國美贖埋批CB後，手頭現金少咗一大嚿，點夠未來幾年要大建物流倉、鋪網絡燒錢之用？蘇寧早排就發新股畀大股東，籌水35億人仔，繼續撐公司大展拳腳。換轉國美，你估黃家會唔會咁慷慨？貝恩又會唔會肯呢？
海迪