中總俱樂部以老牌廣東菜馳名，每次在此吃飯，都十分滿意。與領事R等人拜拜後，在中總門口遇到幾位愛國商人，其中一位與左丁山認識已久，佢細細聲同左丁山講：「死咯，麥齊光墮馬，梁特首好冇面子，點搞好？」點搞？睇嚟梁特首開局開得好曳，左右受困，以後要多多倚賴愛國建制派支持至得，畢竟香港啲中環精英派一早表態支持唐英年，點知押錯注，輸咗啲精英好冇癮，冇乜邊個願意加入梁政府，家更發生梁特首大宅僭建、高永文僭建、麥齊光墮馬、林煥光跳草裙舞等事件，影響所及，啲精英更加抗拒加入政府，無謂唔死一身潺吖。
愛國商人話：「我地一定支持梁特首治港嘅，不過佢真係幾令我地失望，唔講佢鬧人僭建而自己屋企有僭建呢啲嚴重疏忽嘞，我原本以為我地會長蔡冠深或黃保欣公子黃友嘉博士會加入行會嘅，現在全部落空，撐佢都撐得幾心淡，正是有勞無功，但唔撐又唔得！」
聽得出佢有啲激氣兼心淡，但仍然要撐，顯然有不得不為之嘅苦衷。以麥齊光為例子，以後五年，梁特首大可仿效日本、台灣，久唔久就重組內閣，將問責官員重新執位，適當時候委任一兩位愛國商人派做局長，以鞏固後防團結，應付源源不絕嘅泛民攻擊，如果唔識做，只識一味埋怨反對派拉布，製造麻煩，只係表示佢唔識玩民主政治啫，點好意思參加特首普選呀？
飯後例牌散步，行到IFC，收到賓架F來電，佢原來吃飯時睇到左丁山講AmazingGrace，笑咗一輪，特登打電話嚟講兩句，佢話：「喂，你應該識得羅慧娟老公劉志敏嘅噃，佢以前係JF（怡富）要員，JF賣咗俾摩根大通之後，佢先至離開，家係淡馬錫嘅執行董事，故此在新加坡嘅羅慧娟喪禮上，李顯龍夫人與李顯揚都有出席，唔知點解直擊報導冇提及呢？」點知噃，香港娛樂版記者點會認得李顯揚與李顯龍夫人呢啲新加坡財經界大人物呀，香港讀者不可要求過高！