非洲某國駐港榮譽理事R請吃飯，席設中總俱樂部，該國盛產又平又靚嘅紅酒，以大陸流行語，該國紅酒「性價比」直情係冇得比。但冇法啦，香港人飲酒紅硬係鍾意言必波爾多噃，錢多吖嘛！不過好多對紅酒有研究之人就鍾意搵一啲平靚正嘅西班牙，智利，澳洲，加州紅酒，不甘心俾法國酒莊搶錢，譬如歐洲某國駐港榮譽領事K就極力向左丁山推薦匈牙利紅酒，佢話匈牙利先至係釀紅酒老祖宗，法國遲幾百年喎。
左丁山邊度識得呢啲嘢吖，讀上一期「讀書好」嘅鄺穎萱之唐英年訪問記，睇唐英年講述紅酒學問，種葡萄學問，中國內地種葡萄釀紅酒仍有小農心態（即貪多，未識貴精不貴多之學問），先知道唐英年博覽紅酒書籍三十餘年，對紅酒之認識，非泛泛可比。真係要恭喜佢，輸了特首選舉，贏回私人生活，以後避開一切政治現實煩惱，優哉游哉，不亦快哉。
煩惱纏身者，就係贏咗特首選舉嘅梁特首。領事R請吃午飯之時，我地在房間內睇電視新聞，知道麥齊光局長受廉署調查，辭任發展局局長一職，事情來得突然，大家不約而同，放下筷子齊嘆：「何苦來由吖」，兩個幾禮拜之前，若麥齊光拒絕梁特首邀請，不退休後復出做局長，今日可能仍然可以與朋友飲紅酒嘆炸子雞呢？家隨時身敗名裂，真係好杰！
左丁山開玩笑，對在座之W君講：「喂，你有資格做局長啫，資歷與經驗都有，捱吓義氣為人民服務，向梁生毛遂自薦啦！」W君大笑：「想死快過，若我一旦當上局長，恐怕第二日就有人向報紙發放我在上海卡拉OK之快活照片，或者二十五年前在曼谷桑拿嘅圖片，搵個聖人去做局長先至得掂！」發生咗麥齊光事件，相信啲D8常秘會提心吊膽，誠恐一旦膽粗粗去做局長就會俾傳媒狙擊，以後搵局長副局長都係在商界、學術界物色好過咯。吃過午飯，已是下午二時十五分，於是大家拜拜而別，只見隔籬房已經擺好三張麻將枱，侍應已在數籌碼，睇吓人地幾開心，中午吃過飯，未到三點已可在中總俱樂部打麻將直落，六十幾歲人退休後做乜鬼局長吖，到中總嘆吓世界，好得多！