一個人就算幾有料，想見工水到渠成，一套「戰衣」係唔少得嘅。美國非牟利機構CareerGear明白人靠衣裝，於是為準備見工嘅男士，四處搜羅一大堆戰衣，包括西裝、恤衫、皮帶等，用嚟借畀求職男，等佢哋唔會因為冇suit着太失禮，而被老闆out出局。04年至今，呢個機構已經協助當地超過5000個求職男，由「牛記笠記」街坊裝變身「西裝友」。西裝貨源多數係製造商將貨辦或次貨捐出。當中不乏大牌子，好似ArmaniExchange、BrooksBrothers、CalvinKlein等等。有免費戰衣，求職男自信心大啲，見得成工嘅機會都大增！
呢個機構只提供男裝，想借女裝見工嘅美國女士，就要搵另一個志願機構DressforSuccess。如果求職女見得成工，機構仲會提供多幾件衫，等佢日常可以mix&match，相當貼心！唔知香港有冇呢啲既環保又幫到人嘅義舉呢？