金利豐（1031）行政總裁朱李月華今年初收購完先施錶行（444）後，上星期五正式出任公司主席一職，仲順便委任埋囝囝朱俊浩做副主席兼董事總經理，睇嚟朱太想專注賺錢，唔諗參選立法會住囉。
靠買殼賣殼賺大錢嘅「殼后」朱太，今年2月睇中咗先施錶行，以私人名義花咗14億買入心頭好；咁啱嗰時傳過話立法會金融服務界議員「金勞詹」詹培忠來屆唔玩，就傳過朱太有意參選，唔知係咪咁，所以朱太一路都冇加入先施錶行嘅董事會。
之不過，近日市場盛傳詹培忠改變初衷，話唔排除繼續參選立法會角逐連任，所以一直自稱「資歷尚淺」嘅朱太，睇嚟都要叠埋心水專注賺錢，咁做多一間上市公司主席都得啦。今次仲順便帶挈埋囝囝朱俊浩首次做上市公司執行董事，可以貼身教仔㖭！