金融服務界立法會議員「金勞詹」詹培忠成日話今屆有99%唔再競選連任，仲放風話如果前港交所（388）行政總裁周文耀出嚟選，佢就一定讓位，查實呢啲都係金勞詹試水溫嘅招數，佢已經決定去馬嘞。
打電話拉票
聽講金融服務界選民近日陸續收到金勞詹電話，話自己準備競選連任，叫大家多多支持。
老實講，喺金融服務界出得嚟選嘅人，通常都係證券行老闆，個個有頭有面，睇番04年立法會選舉結果，金勞詹得票275張，其餘四個對手加埋都只係得257張票。金勞詹走勢咁凌厲，仲邊有人夠膽出嚟選吖，專心搵錢仲好啦，面子要緊。
金勞詹08年已經係自動當選，市場成日有風話邊個邊個出嚟選，聽講都係金勞詹試水溫啫。唐營嘅金勞詹最近投票反對「五屍實死局」呢個打尖議案夠晒爆，至少俾人知道佢有做嘢，CY喺立法會收爐前畀個機會佢表演，認真唔話得。