雖然投行裁員消息不絕，但都有例外嘅，好似金管局前女將崔歷，短短年半時間又換新工，今次加盟高盛出任董事總經理兼資深中國經濟師，依然常駐香港。
崔歷係研究中國經濟嘅專家，高盛請佢過檔，目的就係要喺亞太區同環球業務提升中國研究嘅實力。崔小姐履歷表相當強勁，2000年已經加入國際貨幣基金組織，做高級經濟師，主要分析中國經濟，一做就八年，之後就加盟金管局，同家已經升做助理總裁嘅朱立翹（Carmen），當年係現任副總裁阮國恒麾下嘅左右手。兩個「同門」女將都係外事部主管，一個主內（內地）、一個主外（國際事務），協力鑽研金融發展機遇。
崔歷喺金管局做咗三年就離開，舊年1月轉咗去蘇格蘭皇家銀行（RBS）做首席中國經濟師，點知話咁快又跳槽嘞。