有冇想過，每天晨早開市，新聞主播不再報道中移動（941）、中石油（857）等中資股的美國預託證券（ADR），中資ADR從此絕迹？
中美兩國爆審計風波
以上情節絕非天方夜譚，更可能在今年底發生。主因是中美的一場各不相讓的審計風波。我哋去年亦講過，自從美國上市的中資民企問題不斷見報，監管美國核數師的組織──美國上市公司會計監管委員會（PublicCompanyAccountingOversightBoard，PCAOB）都想做嘢，覆核內地的核數機構，但被中方處處阻攔。現時中美依然紮馬，之前洽談唔見成果，不但夾在中間的核數師成為磨心。問題再唔解決，連中資股ADR都有機會在年底全面除牌。
目前四大會計師行在內地的核數工作，都是透過其中國分支進行。由於中國對於四大分支都有嚴格的外資規定，四大中國分支皆獨立於總公司的身份在PCAOB登記，才可以幫美國上市的中國民企核數。
內地對外資會計師樓相當有戒心，向來想將行業本土化，即使是四大這些國際品牌都係咁話。官方規定四大要在未來幾年重組，不但要求首席合伙人要有中國國籍，連港台等境外合夥人佔整體的比例都在明年降到四成，2017年再要減至兩成，分明要將四大的中國分支大規模內地化。
中國官方視審計文件（尤其是國企）為國家機密，一方面支持會計師行業本土化，另一方面由2009年開始，禁止四大的中國分支將文件上交PCAOB。不過，幫內地民企到美國上市，係四大、以至好多二、三線會計師行的財路，PCAOB未有積極去制止，而是把問題放埋一邊，打算在2012年底先處理。
但民企風暴成為事件的爆發點，PCAOB想向德勤中國分支攞爆煲股的審計文件，點知中方話此行為係洩露國家機密，被擺上台的德勤最後無上繳文件，呢件事令PCAOB好尷尬。唔少美國基金在民企身上輸掉真金白銀，美國議員都趁機批評PCAOB監管中國民企無乜作為，變成「無牙老虎」。
國開行出資幫手退市
至於對岸大陸，民企風暴以來，越來越多民企老闆投訴，中國民企在美國被MuddyWaters為首的沽空大鱷中傷，得唔到應有估值。亦有講法話，越來越多中國公司為求到海外上市，轉到境外註冊，引起中國資產外流的憂慮。
彭博上周報道，直屬國務院的國家開發銀行承諾出資超過10億美元，幫民企大股東私有化在美國的上市公司，並轉往港交所上市，讓民企有較合理的估值。有喺納斯達克上市的民企就表明，有興趣借國開行的資金退市。國開行的行動充份顯示，當局似乎着手為民企撤出美國做準備。
中美就問題紮晒馬，PCAOB要在2012年底攞番四大中國分支的監管權，真是難於登天。本身是PCAOB委員、北京大學任教的「會計中國通」PaulGillis認為，中美雙方都唔會主動解決問題。
Gillis在97年移居中國，幫PwC打工超過廿年，亦坐過PwC中國的董事會。他相信，PCAOB同中方在2012年底傾掂數的機會只有一成。PCAOB比較大機會將重奪監管審核權的死線一再推遲，留待遲些先拆彈。最壞的情況是，PCAOB在年底注銷包括四大等會計師行中國分支的核數資格，中資ADR一係換上另一間PCAOB承認的核數師，一係就除牌。
回歸香港上市未必好
麥格理最近的報告提及，若果最壞的情況真的發生，佢哋估計，包括中移動在內超過200隻中資ADR都會在美國退市。首200間最大的中資ADR當中，如果撇除中移動等在香港第一上市的股份，估計餘下185間加起來超過1000億美元市值的中資公司，要另覓地方上市。報告引述Gillis分析，ADR退市並唔係危言聳聽，事關從華爾街賓架的角度出發，民企轉到香港重新上市，佢哋一班外資行就能夠賺多一重上市費用，絕對能彌補損失，故此樂見其成。
若果在美國的民企全部回歸到香港上市，當然會有好大筆生意。不過生意背後，香港使唔使放寬對審計行業監管，又會否增加公司爆煲機會，打擊香港市場信譽，對香港資本市場又係咪有利，都係未知之數。