注入美女元素，喪谷事業線，向來係遊戲界必爭之地！早期SEGA噴血作《沙灘排球》，便由鬥波玩到鬥身材，更有大把靚女畀你揀，叫毒男簡直賞心樂透。今次同樣由佢製作嘅《MaxAnarchy》，改以格鬥方式嚟進行，好似近身箍頸、42吋長腿鉸剪腳，甚至玩SM女王式狂踩又掌摑，至怕被打嗰位都唔覺心痛！
記者：陳國輝
索爆！殺手三姊妹
長女 飛鈴
從小已學習各種殺人之術，最擅長以美色為武器，誘惑男人後用長槍殺害，佢亦係家中長女，好照顧兩位妹妹。
二女 鈴鈴
三姐妹之中佢性格最端莊，而且鍾意穿上中式古裝並常露出一對纖幼嘅長腿，至於最擅長就係用扇形嘅武器。
三女 愛鈴
雖然年紀最小，並且長出一幅無邪嘅BabyFace，但講到當殺人落手嗰陣，佢係最狠嗰位，特別擅長用雙節棍。
露背谷胸玩誘殺
查實，呢款遊戲前身係同廠嘅《Bayonetta》，當然，賣點係精采動畫以及華麗嘅格鬥技術！今集以未來世界發生基因變異，製造出一批生化怪物為背景，佢哋唔止有人蛇結合，更出現半人半機械嘅「怪胎」，有啲甚至乎手執巨型電鋸，隨時一嘢拖埋嚟，只怕鋸你唔死！
呢類格鬥Game，血腥畫面梗預咗，但更值得毒男迷戀，睇怕係超Sexy角色至真！例如殺手姐妹花穿上中式俠女裝，長女飛鈴喪谷事業線，二女則露上一雙42吋長腿，招式當中更有以雙腿夾爆頭，血腥又誘惑，玩到大家噴晒血。不過Fans似乎更期待女主角現身，佢外表斯文，戴上粗框眼鏡，十足Miss咁款，查實最擅長係玩美色誘殺，不時露出滑溜靚背，騷弄嫩白肌膚，再施以一招「裸殺」，肯定令你死唔眼閉！
16人網上亂鬥超熱鬧
遊戲本身有StoryMode，任你決定控制Jack或Leo出征，但如果嫌悶，不妨轉玩網上對戰。遊戲共有多達11款搶旗玩法，例如在10分鐘限時內4對4鬥搶得多；又或選擇玩16人「殊死戰」，直至其中一方敵人死光為止。值得一讚係招式非常豐富，除咗閃電、爆炸等震撼畫面，仲加入二人夾擊技，假如一條友打唔掂，咪可以Call隔籬隊友一齊幫拖囉！
Profile
主機：PS3、XB360
類型：動作
製作廠商：PlatinumGames
發行：SEGA
玩家：最多16人
售價：約$770
