每個周末寫這篇稿的最佳狀態，像一個人坐在茶餐廳的二人雅座，叫了一個三點三茶餐然後四圍，不過神遊太虛之際，總有位靚姐會埋嚟溫馨提示：「仲唔食？趁熱先好食嘛……」今日佢提議咗我食新出擔擔麪，惟有應酬佢食兩啖，都幾好味，及得上上海菜館嘅三成。
阿媽可以放心啦，因為我經常都遇到「忽然阿媽」，可能我嘅食相實在太衰嘞，有點母性嘅都會睇唔過眼，然後喺呢個下午茶時段，通常又會透過耳筒聽電台嘅老餅節目《手下留情》，今日佢哋竟然播我童年偶像張立基嘅歌噃，一閤上眼，廿年就咁閃過了。
廿年前嘅自己係點嘅呢？迷糊有啲印象，做緊暑期工，好多青春綺夢，仲好鍾意計劃呢樣許願嗰樣。冇記錯嘅話，當年嘅大計之後冇一樣做到，所以喺之後某年我決定唔再許一啲冇雷公咁遠嘅願望，求其今天的事今天做好就算嘞。
當年與今日唯一不變，係頭上都戴住一個耳筒，還記得當日返第一份暑期工時要喺旺角行到大角咀，每朝我都會播住同一首歌同自己打氣，因此，〈夏日之神話〉的歌詞我可以由尾唱番轉頭，「怎麼這個季節使得我，想起初次聽到這首歌……」前陣子EURO期間，我將呢件芝麻小事同克勤分享了，換來佢的笑聲係有啲不可置信嘅神情，「唔好扮細過我喎……」，咁然後呢放工受完氣時，就事必要將張立基嘅〈異性相吸〉扭到最大聲……「咁細心不如做醫生吖，對住啲病人亂噏冇句真！」先順番條氣。
咁廿年前還去了一趟外展訓練，過程中要喺個孤島獨自過30個鐘，冇嘢食冇水飲，仲有紙筆，因為導師要求我哋寫封信畀自己，然後一年後佢會幫我哋寄番去屋企，幾有詩意呀，尤其係你眼前只得一片大海同不時有啲大飛飛過的時候；當年寫乜我冇乜印象，總之人生最重要的，就是愛情事業係咁多，眼中冇朋友冇家人冇信仰，非常膚淺，之但係一年後我又冇收到呢封信喎，因為我寫完之後唔記得咗交。
廿年前的我固然諗唔到廿年後的我仍然係「唔嗲唔吊」，不過今日最重要的，已經變咗係家庭和身體了。今日的我仲有乜願望？得一個啫，就係希望下屆韋斯咸護級成功啦！寫完嘞，「仲食唔食呀？」阿姐又來了，作勢想收嘢，我出手阻止，「仲要㗎，我食咗一啖咋！」走吧，走吧，有乜下屆再傾啦。
文：keyman