「杜奧巴，很想去捕捉他！」上海球迷噚日真係可以喺浦東機場「捕」到佢，事關擾擾攘攘後，呢位「魔獸」前鋒終於正式去新東家中超上海申花報到，上周六飛抵上海舉行記者會，作為中超最大牌外援，杜奧巴一堆LV喼同袋，派頭都唔講得笑。
帶足25件行李
我求大俠稱讚杜奧巴係中超最大牌外援，一啲都冇過份。雖然廣州恒大嘅孔卡當選過巴甲最佳球員，不過杜奧巴贏過英超、歐聯等主要錦標，攞埋非洲足球先生、英超神射手等等獎項；杜奧巴上周六早上8時步出機場，現場已有幾百位球迷同傳媒等候，34歲嘅杜奧巴都好識做，不斷向球迷揮手致謝。杜奧巴托運嘅行李多達25件，睇嚟都有心喺中國發展，最豪當然喺3件LV行李包，港女當LV係寶，但對盛傳年薪以千萬歐元計嘅魔獸嚟講，LV都可以粗用。
杜奧巴下午就出席記者會，從申花董事周軍手上接過11號球衣後，就大談東來感受：「我嚟中國原因，金錢並不是最重要，我希望體驗全新嘅生活。」呢位科特迪瓦國家隊隊長仲講，會利用自己嘅影響力，喺中國推廣慈善事業，幫助非洲有需要嘅人民。
虹口撐場申花即贏3:1
之不過申花開季至今只排中下游，家目標喺護級就貼切啲，安歷卡表現一直平平；不過杜奧巴就力撐呢位前車路士隊友，仲話會令佢留隊奮戰：「我一個人不足夠幫球隊帶嚟勝利，需要全隊共同努力，我會同安歷卡一齊入波。」杜奧巴腳頭認真好，噚晚主場對北京國安嘅中超比賽，杜奧巴現身虹口體育場，就算安歷卡有病缺陣，仍然以3:1大勝。杜奧巴最快可以喺下周日（22日）作客廣州富力嘅中超比賽登場，廣州富力都有前愛華頓前鋒耶高保壓陣，香港球迷有心，去廣州一口氣睇到3位前英超前鋒比拼，都值回票價啦！