巨星周潤發、陳冠希、陳奕迅搭公車？係真唔係呀？定係人有相似？如果搭搭吓車見到明星喺隔籬，你會以為眼花睇錯，定係電視節目大整蠱？各位快啲估吓邊個係真明星，邊個係A貨啦！
撰文：魯亞途
陳冠希搭港鐵？
話說前幾日着上一身潮服嘅陳冠希（Edison）驚現港鐵車廂，由東涌搭到去深水埗，乘客見到Edison即嘩聲四起，有小妹妹更爭取時間影合照，難得Edison好鬼親民，令人懷疑呢個Edison係翻版，好彩佢手上有招牌嘅CartierLove手鈪，所以先證明到呢個係正牌貨。原來Edison嚟緊下月出碟，所以佢幫now拍攝音樂特輯，仲走去鴨寮街拍攝！
Eason逼巴士？
如果喺公車度見到陳奕迅（Eason），你會點?早前網上流傳一張Eason搭巴士嘅相，由於成架車都坐滿乘客，所以歌神Eason都要屈就全程罰企，不過如果仔細再睇張相，就會發現呢個Eason好年輕，身形又瘦削，似乎同今年38歲嘅Eason有啲距離，原來呢位真係翻版嚟，就連正版Eason都高呼同自己餅印一樣！
發哥企隔籬？
賭神周潤發〈上圖〉雖貴為國際巨星，但係人都知佢最愛融入普通市民堆中，平日愛行九龍城街市買餸，巨星駕臨，搞到人人趨之若鶩。如果搭搭吓港鐵同巴士，發哥企喺你隔籬，一啲唔出奇，因為發哥一向公認親民到爆燈，邊個搵佢合照，佢都來者不拒，呢啲就係王者風範。