奧運將於英國時間本月27日舉行，香港選手已陸陸續續出發往選手村準備。其實娛圈一樣臥虎藏龍，在這裏揀卒參賽亦未嘗不可；馬術可搵鼎爺上陣，老馬有火；阿嬌跨欄英姿不遜劉翔；就算飛魚王子方力申唔游，心姐泳術一樣高超；講到最有把握的，當然還是擅長放冷箭且能一箭雙鵰的TVBuddy啦！ 撰文：蘇芬妮
籃球 余文樂
前港青，球風瀟灑見稱，在元朗打波邊個唔識得「元朗小霸王」？家陣與周柏豪組成橫州工業，邊打波邊行善，抵佢有班妹妹fans效忠。
馬術 李家鼎
真正嘅馬神唔係馬德鐘，而係鼎爺。CrazySteve一生贏過200個馬術獎，不過馬術講求華麗，如果鼎爺比賽中途爆一句「跳唔X到個欄」，就肯定取消資格。
跨欄 鍾欣桐
中國有欄王劉翔，香港也有欄后阿嬌，當年她代表學校參加一百米欄學界比賽，更奪過亞軍。好明顯，腿張開絕對難唔到經驗老到嘅阿嬌。
馬拉松 李家仁
小明跑得快過火車，加上他日跑夜跑，先上廣州、再去東莞、又返深圳，真係唞吓都唔得。如果佢識埋輕功水上飄，你驚佢唔會跑埋去英倫？
羽毛球 蒙嘉慧
羽毛球混雙人選，首推蒙嘉慧、鄭伊健，佢兩個06年打羽毛球結緣，畢竟夾咗六年波，情侶合璧無堅不摧。男雙的話，就梗係顏福偉搭鄧浩光，連白花油都可以當波打，技術超晒班。
沙灘排球 傅穎
看過電影《熱浪球愛戰》，都知傅穎打沙排有幾狼幾狠（雖則係電腦特技），又唔怕食波餅，尤其她穿兩件頭泳衣上場，唔打得都睇得。
游泳 謝雪心
正路梗係搵飛魚王子方力申啦，話晒都出戰過奧運，不過佢近日潛水多過游水，惟有徵召N年前曾在維港渡海泳奪獎的謝雪心參加。
柔道 崔建邦
崔建邦打泰拳出色，玩柔道一樣耍家，但只限跟女子作賽。相信中巴鄺敏慧一定感受最深，當年她聲稱被邦邦一記奪命鉸剪腳挾爆，動彈不得。
乒乓球 陳展鵬
陳展鵬打乒乓波堅係勁，以前係香港乒乓球隊代表，仲夥拍過第一代乒乓孖寶陳丹蕾和齊寶華出賽。可惜近年轉投無綫，自我感覺良好，唔打平民pingpong，轉打高檔golf了。
網球 李思雅
05年選港姐前，李思雅是康體發展局網球代表隊成員，參加過國際性賽事，更在香港奪得18歲以下雙打冠軍，可謂打遍天下無敵手，原來她受父母影響，10歲已開始打網球。
劍擊 邵美琪
邵美琪在《心戰》雖然壯士斷臂，但玩劍擊「單手都打贏你」，劇情交代她更代表香港參加奧運。見她單手勒死揚明的狠勁，就知女人唔可以得罪。
足球 陳七
陳七喺娛樂版見報仲多過體育版，已經是半個娛圈人。近日雖被南華放逐，但仍可「升中」踢中甲，證明「香港第一中鋒」都係有市場價值。
體操 陳浩民
「璇美人」轉型拍劇，不再留戀體壇。宏觀娛圈眾星，最縮骨者非陳浩民莫屬，當日他明明抽完陳嘉桓水，還死撐說要「帶眼識人」，最終要拖大肚妻來謝罪，縮骨功架媲美「港男十八式」。
單車 陳奕迅
「騎着單車的我倆，懷緊貼背的擁抱」，冇錯就係陳奕迅（Eason）隻飲歌《單車》，若奧運安排新項目，邊踩邊唱歌吹水，Eason冇得輸。
《強烈要求追加項目》
桌球 陶大宇
過氣師奶殺手陶大宇，近年人氣不再，唯有靠篤波打發時間，日篤夜篤下鍛鍊出超凡球技，喺牛頭角街坊桌球館都有佢嘅紀錄，如果借埋秋官枝「倚天Cue」就perfect。
保齡球 劉德華
眾所周知，劉德華係保齡球癡，以前唔使開工，一得閒就去碌齡，閒閒哋打200分。不過家榮升人父，相信所有空閒時間都去晒老婆同個女度嘞。