7年前，李嘉威（Calvin）取得港大生物科技學士學位，同屆同學不是投考化驗所，便是繼續深造，這位天之驕子卻早已厭倦披白袍、入實驗室的日子，邊做文職，邊練射箭。下周一，他將帶着「天價」弓箭，勇闖倫奧。
「我做咗文職年半後，轉做全職射箭教練，家教3間中學同智障選手，一星期有時返足6日。」Calvin自中二、三時已愛上射箭，昨在元朗一場練習賽，72箭射出622環，自言未夠好。今個星期他作最後衝刺，每課練習將練400支箭，只求將狀態推到最好，「排名賽目標喺650環，即超越自己最佳成績。64名選手根據排名賽成績，定出淘汰賽對手。如第64會對第1，我希望排3、40左右，淘汰賽首圈避開強手，有機會入到第2圈。」另一任務，就是要了解新「拍檔」。
為奧運豪花60,000元
「一把弓要20,000蚊，2月我買咗一把，兩個月後買多一把，奧運時爛咗都有士啤。」平日審慎理財的Calvin為奧運破例豪花，連同數十支比賽專用箭，大約花掉60,000元。自言為圓首個奧運夢，再貴都值得，「有成20年都冇香港射箭手去奧運，早幾日先知自己係港隊42個運動員之中最早落場嗰個，興奮多過緊張！」Calvin在英國時間27日早上出戰，同一晚會出席開幕禮。
李嘉威個人小檔案
出生日期：03/04/1983（29歲）
身高：1米72
體重：68公斤
個人反曲弓最佳成績：637環（72箭）
威水史：2011年倫敦奧運亞洲區資格賽第4名
註：72箭滿分為720環