黃貫中（Paul）的紅館個唱前晚揭開序幕，懷孕7個月的女友朱茵未有撐場，Paul笑言要出動鎖鏈才能阻朱茵出門，但返家會再唱多次慰藉她。前晚焦點落在陳豪和黃德斌兩位嘉賓身上，二人與Paul合唱《年少無知》，雖然表現得驚驚青青，但獲全場粉絲和唱，掀全晚高潮。
搖滾歌手黃貫中前晚在紅館為一連兩場的《Rockestra》個唱揭序幕，腹大便便的朱茵未有撐場，但Paul爸爸、蔡一智、蔡一傑、Mr.、少爺占等均有現身睇騷，入座率約七成。
吸師奶粉絲
Paul的演唱會沒有華麗舞台及歌衫，他全晚換了三套全黑服裝，除獻唱多首Beyond的經典金曲，還與管弦樂團合奏古典樂曲《天鵝湖》，Paul說：「邊個話古典音樂唔可以同搖滾一齊㗎，喺呢個樂壇生存唔係易事，仲要生存咗30年都冇俾人一腳伸走，多謝大家嚟支持我，令我生存到今時今日。」
Paul邀請了陳豪和黃德斌做表演嘉賓，並合唱由Paul作曲的電視劇《天與地》插曲《年少無知》，Paul大讚二人好夠薑，但二人在台上卻表現驚青，陳豪更說話不多。Paul笑說：「你哋好驚呀？但因為你哋，今晚多咗好多師奶。」德斌又解釋林保怡缺席原因：「《天與地》太紅，令保怡喺內地好忙，所以嚟唔到。其實亦因為啲師奶，令我可以踏足紅館同阿Paul唱歌。」陳豪和德斌的聲音雖唔入咪，但在歌迷和唱下，掀起全晚高潮。
返家再開騷
完騷後，Paul在後台受訪，他說要花盡唇舌兼用鎖鏈才勸到朱茵留在家中：「我叫佢去後台睇電視又唔肯，我都知好冇癮，或者返屋企重新唱一次畀佢聽。」Paul又讚朱茵偉大：「大肚冇得出街好慘，覺得女人好偉大，但女人旁邊嘅男人仲偉大。」Paul未肯透露朱茵腹中BB性別：「個個都開賭，知都唔講。」問是否懷孖仔所以通殺？他笑說：「唔好啩，阿茵咁細粒生兩個好辛苦。」
另外，陳豪昨去到大埔科學園為最新樓盤宣傳。陳豪說會將辛苦賺來的錢用作物業投資，但他未試過與女友陳茵媺一齊睇樓，並說：「唔贊成同居，我係保守派，做男人要照顧到女友先得，等有進一步發展先。」陳豪被問距離結婚還欠甚麼，他說：「欠大家嚟支持，同時機。」
採訪：李珮洳 攝影：陳俊強