旺角波鞋街自80年代起成名，不少售賣運動鞋和運動用品的商戶集中開舖，形成一個極具特色的購物街。本報記者昨直擊訪問數名正在該處購物的市民，不少都慨嘆波鞋街歷史悠久，重建在即擔心會失去本土特色。
波鞋街是旺角特色
現職物業管理的黃先生直言「自己買親波鞋都喺度（波鞋街）買，都買咗成三十年！因為呢度款多，又易比較價錢」。現時就算不買，都會隔數星期便來一次，對於區內重建在即，黃先生感到可惜，「好多同屋企人、朋友嚟買嘢嘅回憶都驚會冇晒！」
曾為街坊的梁先生表示，基本上每星期都會到波鞋街，因為款式多、舖位又夠集中。重建區落成後，將會有數層零售樓面，梁先生指「要行上行落，冇咁方便，都係家好，最好維持原狀」。
文員周小姐表示，波鞋街是旺角特色，如果重建，可能會影響周圍購物的環境，「唔係咁好，不過都期待改建之後可以行得舒服啲！」
學生曾先生認為，「以前波鞋街好啲，家有一部份冇咗，就算重建後，都唔夠original（原本）好」。