麗悅（2266）高息，防風力有番咁上下，橫風橫雨期，有得諗。麗悅2012年度純利一枝箭飆升咗近兩倍，到6億銀，派息亦疏爽，全年派息0.12元，息率上到8厘，甚至吸引過部份所謂高息REITs。又麗悅呢期公佈，出售帝盛酒店，呢壇製作若果順風順水，估計獲溢利過4億銀。要咁睇，麗悅有嚟自酒店業本身資產價值升值變現嘅支持，相信可以過渡兼享受到未來祖國另一轉經濟起飛，而2013年度業績，都應該繼續靚仔，兼Keep住高息政策。再講，麗悅最新NAV近5.6元，現價（1.44元）大幅折讓過七成，呢個折讓水位，亦同唔少REITs睇齊，吸引到痹。呢轉買麗悅，係咁意博升30%到1.87元，到時息率回報仍然高達6厘，實情仲係好吸引。
中化肥有望撈底
中化化肥（297）唔計07年高位，單係一年以來，已經跌咗六成，現價（1.32元），仲殘過08年嘅金融海嘯期最低價2.43元。而集團NAV折讓，就擴大到38%，已經有唔錯折讓墊底。另中化肥去年底嘅淨負債比率，唔過30%，喺安全範圍之內。呢轉博中化價殘反彈，升20%到1.58元，未有耐上到每股NAV2.3元水位。
錢雋