【本報訊】生活在本港西部泥灘的「活化石」馬蹄蟹近年因數目大減。為增加馬蹄蟹數量，20間中學學生「湊大」500隻人工繁殖的幼年馬蹄蟹後，在元朗下白泥放生。有專家希望當地泥灘可被列為「具特殊科學價值地點」限制發展，給馬蹄蟹一個安定的家。
其中一間飼養馬蹄蟹的英皇書院，就讀中四的陳頌暉表示，二月剛接收50隻幼年馬蹄蟹時，同學都不懂飼養，「初時水缸放得太多水，但原來水壓太高，細細隻馬蹄蟹好易死；水缸濾管太粗，馬蹄蟹會吸入去，要加紗布」。其後知道乾淨海水可減低馬蹄蟹的死亡率，「同學要經常換水，餵豐年蝦畀蟹食都要換缸；見到馬蹄蟹有病，要即刻將佢隔離，驚會傳染其他蟹」。
如不保育快將滅絕
可親眼目睹馬蹄蟹換殼過程，陳頌暉仍歷歷在目，「好難得，野外根本睇唔到」。飼養馬蹄蟹五個月，仍有38隻生存，「啲蟹大咗一半，有啲仲改埋名，唔捨得放走佢哋」；博愛醫院陳楷紀念中學的中三學生汪琳擔心，香港西部持續發展及填海，會扼殺馬蹄蟹的生存機會。
馬蹄蟹的棲息地近年因基建發展及水質污染而受破壞，部份泥灘的馬蹄蟹數量更於十年內大跌九成。
香港海洋公園保育基金副總監吳守堅表示，如不盡快保育，馬蹄蟹數十年內會絕迹香港。
他指出，城大與中學學生聯合繁殖馬蹄蟹，存活率已由去年的百分之十六，上升至今年的百分之五十二，馬蹄蟹的放生數量增加，「希望下白泥可成為具特殊科學價值地點，趁未發展前先做好保育工作，唔好影響當地嘅生態環境」。
