童樂日：韓風小三點　浮誇愛星星

呢兩個星期嘅周末，完全被陽光同藍天白雲所包圍，除咗我哋想去曬太陽，其實小朋友都好想到沙灘玩玩水、砌砌沙；今年小朋友潮興泳衣，主力玩鮮艷奪目，老實，就算好多大人都唔敢着！唔想小朋友大個後有所遺憾，一定要畀佢哋着吓囉！
記者：陳家蕊　攝影：陳盛臣
Model:LuiChing、Hugo、Ava@PureModels
鳴謝：黃埔新天地（21218344）

復古色艷　玩轉三點

每個女仔衣櫃裏面「最大殺傷力武器」，相信非三點式泳衣莫屬，不過喺成人世界裏面，選擇三點式泳衣時總有所顧忌，事關如果太浮誇，可能會被說成唔知你想博乜！
小朋友世界、完全大不同！今年韓國童裝界就熱爆浮誇版三點式，紅黃色胸衣上有兩粒紫星星作裝飾，相信一定是可愛小妹妹嘅專利！復古都係今年重要課題！你會發現好多新返韓版三點式，下身都會配合紗裙元素，使小女孩變得有如小公主般，動感又俏皮！
另外日版方面，日本品牌ComicalKid's新推三點式，顏色繼續運用小妹妹最愛的鮮粉紅，搭上永恒可愛的圓波點，相信小女孩在沙灘上走動時，定會吸引附近大姐姐們的羨慕目光！

粉紅波點泳衣$239/b
圓圓波點配珍珠反光粉紅色底，滲出甜甜的可愛！

斑馬兒童泳衣$118/c
斑馬紋連帽的三點式穿在妹妹身上完全不俗氣。

網紗蝴蝶結泳衣$116/c
多層次的胸衣加上腰間蝴蝶，更顯小公主的優雅大方。

連身男孩公仔愛型

從前男生去沙灘，可能只有簡單泳褲仔可以選擇，可是由日籍名設計師美代子操刀的新日牌——Pankis，就讓男孩們多一個美麗的選擇；Pankis一向愛玩多元化、新穎設計，由佢平時嘅童裝到文具就睇得出！
今季新推男生連身泳衣，泳衣上有他們的品牌標誌——熊貓仔仔的點心家族公仔，配上今季至Hit嘅鮮藍或鮮橙，穿上後除了可愛，感覺亦非常型仔！
另外以安全為宗旨的本地嬰兒品牌Mides，佢哋亦引入了澳洲BanZ的女裝連身泳衣，粉色的設計，完全不同一般的日韓風格；最重要係佢玩埋實用功能設計！為針對澳洲充足的陽光，與最嚴苛的紫外線環境，所以衫身使用了抗UV達UPF50+的設計，功效隨時強過你買嗰支太陽油，用以保護小朋友幼嫩嘅皮膚就最啱！