現職now主持嘅丘凱敏（Anna）呢個月3號低調做咗龍年新娘，佢喺加拿大同拍拖兩年嘅圈外男友註冊，升呢做咗黎太，Anna首要學好廚藝，佢笑自己呢方面係有限公司，為咗等老公有啖好食，佢會喺呢方面好好下苦功，跟住就會幫黎家開枝散葉，生個胖白肥B。
Anna話老公黎先生做銀行業，佢行事低調，佢哋成為夫妻後返港開始陸續通知親友，婚訊最終曝光。
三卡鑽戒顯誠意
Anna話做龍年新娘早有計劃，佢噚日喺電話度話：「我哋拍咗拖兩年，大家開始嗰陣已經認定對方，早有共識，今年初佢同我求婚，於是就開始籌備。」黎先生更用三卡鑽戒加誠意去打動Anna下嫁。
37歲嘅Anna話婚後生育計劃順其自然：「我哋都鍾意小朋友，但一個夠晒數。」Anna話最唔習慣係將老公媽咪改口稱呼做奶奶：「我成日叫佢做auntie，好蝦碌。」Anna大讚老公有128分，又話：「老公好孝順，為人幽默又叻仔，我平日問題多多，佢冇嫌棄逐一解答，教咗我好多嘢，家我由問題少女做咗問題人妻。」