林峯、楊怡、馬國明、陳敏之同陳展鵬等噚日喺新都城幫新劇《回到三國》宣傳，林峯遲咗半個鐘，連累全部人等佢，佢解釋話：「我準兩點嚟到，點知滴完滴眼藥水，架車就唔知駛咗去邊，之後兜咗半個鐘先返番嚟。」
肉緊攬阿媽
眾人喺台上蒙住眼估拍檔，馬國明原先摸中楊怡隻手，開估嗰陣戲中阿媽韓馬利自動投懷送抱，馬國明都攬到實鬼咁肉緊；而林峯怕摸錯梁嘉琪嘅敏感部位，佢話：「不如你自己行埋嚟。」《回》劇收視高開，但有網友批評製作馬虎，千軍萬馬嘅場面連馬仔都冇隻，又話馬國明演技太過浮誇，林峯話：「大家睇得開唔開心先？一早講咗呢套係小品劇，冇大型戰爭場面，只係交代歷史背景。馬國明份人比較靜，今次佢好大突破。」佢仲話通常節目巡禮同真實拍嘅人會有出入，馬國明絕對唔係執吳卓羲二攤。
有傳前度緋聞男友黎諾懿轉媾富家女李潔瑩，楊怡戥佢開心：「有拖拍係好事，我一定祝福佢。」