【上海直擊】劉嘉玲近年榮升生意人，昨日她在上海連開三店，一網打盡夜店、時裝店和手錶店，又透露有意投資電影。嘉玲笑言年紀大，不敢做自家時裝的代言人，可能出動老公梁朝偉代言手錶，但由於老公身價貴，要儲夠彈藥才可以請到他。
劉嘉玲昨日在上海舉行新店開幕發佈會，宣佈她做董事的Muse夜店、Tendence手錶和GiulianoFujiwara服裝，三店一齊進駐商場。嘉玲一身自家品牌的黑白裙、手錶現身，台灣微風廣場千金廖曉喬、鐘錶美女胡敏珊等都有出席，好友、台灣女星賈靜雯更在手錶店做一日店長作招徠。
稱追不上步伐
嘉玲直言未試過一日開三店：「未試過，其實店都做緊生意，今日一次過慶祝，中國好大，發展步伐好快，我都跟唔到。」她謂投資不大不小，有專人負責看生意，沒特別計劃過：「好多嘢係做開咗個頭，會有人合作，應付到就做，盡力而為。」她謂也想投資拍片，但暫時未實行到，一步步來，嘉玲不敢以成功人士自居。
年紀老做幕後
問到老公梁朝偉可會也搞搞生意？嘉玲即笑說：「佢唔同人打交道㗎喎，點會做生意？做生意最緊要同人打交道，佢好support我，乜都幫，義不容辭！」代言？她說：「手錶可能會搵佢代言，要儲子彈，佢好貴。」兩公婆沒優惠價？她笑着說：「要照畀錢㗎，佢值咁多喎，其實我以前都打咗唔少斧頭。」何不自己代言，嘉玲卻嫌自己老：「會搵啲後生啲嘅，我年紀大，時裝上就退後啲，想搵摩登啲、有型啲、靚仔靚女做。」全力做生意，嘉玲表示也會繼續拍片，9月拍《狄仁傑前傳》，趙又廷將出演年輕版狄仁傑。
採訪、攝影：林妃