葡萄牙球星基斯坦奴朗拿度（C朗、小圖），最近經常同女友艾琳娜四周圍度假；原來亦同時靜雞雞喺葡萄牙起緊佢哋嘅豪華愛巢（圖）。呢幢夢幻別墅設計極盡奢華，有成15間房同私人泳池等等，只係使咗C朗400萬歐元，對於一年總收入近3,000萬歐元嘅C朗，真係濕濕碎。最勁嘅係別墅起喺好斜嘅斜坡度，周圍機關重重，淨係改造同裝修都用咗成年幾時間，為咗避開狗仔隊，有傳呢間別墅係唔可以喺陸路去，每次C朗同女友返愛巢，都要坐直升機先去到，認真巴閉。