效力曼聯嘅英格蘭前鋒朗尼，之前賣開體育用品、汽水同埋電視遊戲之類嘅廣告，但我求大俠相信，遲吓佢連成藥呢瓣都撈埋。至於代言啲乜？之唔係陽萎男救星「偉哥」囉！
朗尼雖則得26歲，但遇到男人最痛─禿頭。查實早喺舊年暑假，佢就使咗30幾萬港紙植髮，總算解決咗M字額問題。啲頭髮多番，自信心當堂返晒嚟，人都靚仔咗同醒神咗，成季仲入咗成38球；美中不足之處，係佢幫唔到曼聯同英格蘭國家隊贏到獎盃。其實佢除咗植髮之外，仲食埋生髮藥，實行雙管齊下；但隻藥分分鐘令佢老婆高蓮「守生寡」！
所用生髮藥引致陽痿
朗尼喺09年開始食一隻叫Propecia嘅對抗禿頭藥丸，但華盛頓大學嘅米高艾偉醫生就話，呢隻藥嘅副作用好勁，有兩成嘅病人搞到引起持續性功能障礙，仲維持咗多過5年；簡單啲講，即係不舉。生產Propecia嘅藥廠Merck就堅持，冇證據顯示隻藥會導致男人「6點半」。不過，Propecia係香港處方藥物，胡亂服用，唔單止犯法，而且可能出現副作用，後果自負。
香港體適能總會會長黃平山醫生就話：「Propecia會減少男性荷爾蒙，會降低肌肉嘅強度，對運動員嚟講唔係好事，而且亦會令男性精液減少，影響性生活。」按英國法例，Propecia喺包裝上列明該藥品嘅副作用，以保障藥廠、醫生同埋病人嘅利益；黃醫生亦提醒有禿頭問題嘅男人：「男士一旦有脫髮問題，最佳方法仍然係睇醫生，尋找根源同埋最合適嘅根治方法。」
點都好，如果為咗外貌而搞到身體出現問題，咁就唔抵；更何況，朗尼又唔係好似前曼聯隊友碧咸或C朗咁sell靚仔，頭頂多番啲毛毛，最多令佢個樣望落後生啲，但就唔會靚仔咗。如果我求大俠係朗尼，就一定停食呢隻藥；除非佢好想開多條財路，想藥廠搵佢代言「偉哥」威而鋼啦！
另一曼聯球員費查個頭冇問題，但條大腸有事，長唞完之後到家陣都未練習到；但紅魔領隊費格遜就講明，如果費查踢唔番波，就安排番一官半職畀佢；老費咁做，算有情有義。