「戲王之王」詹瑞文與資深舞台劇演員妻子甄詠蓓，從演藝學院讀書時期相戀繼而結婚，03年誕下女兒詹樂童，不過有指這對合拍夫婦因錢爭拗而婚變，昨日詹瑞文承認與太太已經分居，各自展開人生新一頁。
詹瑞文多年來與太太甄詠蓓互相扶持，不過近日有指兩人因價值觀問題，於今年初分居，女兒詹樂童交由太太照顧，阿詹則於紅磡獨居，昨日他在觀塘出席一快餐店活動，大方承認與太太已分居一年。
「拗撬好正常」
詹瑞文說：「我同甄詠蓓好好朋友，我哋相處咗20幾年，大家經歷咗人生好多事，已經係智慧老人，我哋好有默契，好了解大家嘅關係、婚姻，我哋家係尋求緊人生新嘅一頁，我哋協議分開一段時間，大家各自努力投入自己喜歡嘅工作。」他表示大家的風格不同，如果仍堅持做一樣工作會比較吃力，於是便決定分開做。
問詹瑞文是否因此而產生不少爭拗？他說：「其實有拗撬係好正常，唔只係兩公婆嘅問題，就算我同人合作，一定會有意見唔同，我哋都好成熟，所以咪諗點樣處理係對大家都好，冇變嘅係個女仍然係我個女，我哋兩個都好錫佢。我都有同個女講，我哋一齊去經歷呢啲轉變，我哋嘅關係都好咗。」
詹瑞文感謝朋友和家人的支持，他說：「發生呢啲事，唔開心係好正常，不過已經過渡咗，喺過程裏面慢慢學習。」
未決定離婚
關於離婚的手續，詹瑞文稱仍未決定，他說：「我哋唔係話幾時辦離婚手續，只係分開住，各自各工作，去到一個階段後再討論好似以前咁生活，抑或搞離婚手續，家我哋都好正面去睇呢件事，我哋都一齊行咗22年，有幾多人真係可以行咁長嘅路，不過我嘅人生仲有好多個22年，所以都好期待。」他否認分居涉及金錢或第三者。
採訪：何慧斯
攝影：仇志德