過氣香港足球先生陳肇麒（陳七）一度係球壇明日之星，可惜佢衰爛滾爛煲煙，陳七早前帶模Emily去爆房，辣㷫南華班主羅傑承，炒魷後陳七短暫掛靴兩個月，仲潛水避記者。直至前日佢終於蒲頭，陳七原來簽約加盟中甲球會廣東日之泉，效力18個月，佢重提自己嘅過錯，喺記者會喊足三次。
爆房女斬纜
陳七變喊包，正印女友組合MVG成員Toby呵番，男友事業有着落，Toby當然最開心，前日仲喺Instagram貼咗佢哋黐頭芒相晒恩愛，佢哋關注嘅朋友都like爆，Toby留言力撐：「無論你在那個地方努力，我會默默的等待。在你背後禱告、祝福、支持！我愛你。」陳七馬上回應：「有你呢番說（話），我放心了！我會為我哋嘅將來努力，我愛你。」佢哋係咁「我愛你」來來往往，隔空傳情，鬼咁肉麻。
對於陳七有意迎娶，Toby噚日話：「我哋有共識，認定對方㗎啦，不過家大家各自事業為重，為將來努力吓先。」小三Emily都大方恭喜舊愛有嘢撈話：「咁咪好，有嘢做。」會唔會傳短訊恭喜陳七？佢話：「我哋冇聯絡啦。」咁有冇嘢公開同陳七講？Emily話：「努力，OK。」