【本報訊】周大福（1929）前晚漏夜公佈「樣衰」的首季度（4至6月）數據，昨日被投資者狠沽近9%，還「陀衰家」拖累整個板塊下跌。周大福昨午舉行投資者電話會議，被分析員狠批「前言不對後語」，認為公司仍死撐下半年可以顯著復蘇，只屬空話，難以實現。 記者：吳綺慧
周大福股價昨日再大插水，最多曾瀉逾一成，收報9.45元，全日跌8.8%，市值蒸發91億元，沽空金額大增。
標榜「真誠、永恒」的周大福，其管理層在6月底時曾向投資界表示，首季度表現較1至3月時「不會差太多」，令市場覺得集團業務水平應是平穩，甚至會比六福（590）香港區同店的7%增長為佳。到本星期集團才突然「爆響口」，向部份券商透露了同店表現，最後被迫要提前公佈數據。
「對高層說話唔使認真」
有外資分析員坦言，對周大福的表現及數據公佈手法，都感到相當失望，認為以後對管理層的說話，都「唔使咁認真」：「由佢哋上市開始，亂吹出一個不可能實現嘅盈利預測；到家公佈上市後第一個季度數據，都可以同兩星期前講法爭咁遠，證明呢間公司以後俾乜guidance（指引），都可以唔使信啦！」
昨日周大福下午4時半舉行電話會議，由董事總經理黃紹基及財務董事鄭炳熙主持，儘管首季度整體同店增長只有4%，港澳區更倒退1%，但管理層仍堅持不調低全年度業務指標，包括同店銷售增長會有雙位數、毛利率及宣傳推廣費用比率保持平穩等。
遭分析員轟「無邏輯」
不過，另一分析員直指周大福的解釋「無邏輯」：「佢話下半年度會復蘇，原因只係下半年多假期，係銷售旺季，咁去年同期夠係旺季啦，用呢個理由解釋增長加快，根本無道理。」他估計，7至9月同店表現只會更差，香港區有機會倒退5至10%，「首季金價按年仲係升值7%，但到咗下一季，金價按年比較會變成下跌，想唔差都幾難。」他指更令人擔心的是，周大福過份擴張後，已令店舖及盈利質素下滑，這是很差的訊號。
花旗報告表示，儘管市場已預計周大福首季度表現疲弱，但最後數據明顯差過其估計，該行相信7至9月份表現只會與上季相若，因此下半年度同店增長要強勢復蘇至14%以上，才有機會達到其盈利預測水平。德銀亦稱，由於集團毛利較高的珠寶銷售比重明顯下降，估計首季度毛利率已較去年度下跌兩個百分點。
