時下有那個香港人不希望能日日有住家菜食，讓一家人聚在一起吃餐飯，但奈何日忙夜忙，別說煮九大簋，只是一頓簡單四餸一湯，也沒有時間洗洗切切。現在就有人看準這個機會，提供度身訂做的烹調私房菜服務，不理你屋企有幾多人，都會出動FullGear，上門奉上住家菜，讓你重拾家中溫暖！
記者：林敏婷
攝影：譚盈傑
模特兒：Edgar、Evelyn@PureModels
鳴謝：Easy．Chefw+CookingStudio
靠食物打關係
以前從事活動統籌公關的Stella，和很多香港女士一樣做到日忙夜忙，煮飯對她來說只是一個興趣，「我很喜歡煮嘢食，煮畀家人朋友食，睇住佢哋在家中聚埋一齊，食你煮的食物會好開心。」她明白很多香港人都沒有時間煮飯，一家人食飯總要到外面餐廳，少了很多溫暖，為了幫客人重拾家庭溫暖，她甘願放下多年的工作，個多月前全職投入做一名的上門大廚，「做慣了PR，很喜歡同人溝通，如果我能夠用食物去拉近人同人之間的關係，絕對係開心事！」每次上門，她除了要買餸，仲會帶齊煮食用具同調味料，為客人設計一些獨家菜式外，還有不少客人怕工序繁瑣而不會自己煮的菜式。以五道菜約四人份量為例，由上門至完成花個半小時左右，速度尚可接受。現時客源暫以辦公室文職和設計師為主，希望靠口碑，日後可以吸引不同層面的客人。
酒樓級水準
Stella設計的菜式由家庭式蒸烏頭到酒樓級菜式都包辦，最矜貴莫過於海膽扒燜煮鮮鮑魚，她選用經濟實惠的新鮮鮑魚仔，清洗乾淨後拆殼，用蠔油燜過夜，而鮑魚殼亦會消毒留待上碟用，燜至稔滑的鮑魚上鋪上新鮮海膽同金箔，在家能嚐到如此鮮味真是一樂也！好多人怕街外食海鮮，食時無晒儀態，好彩Stella愛煮海鮮，拿手的粉絲炒蟹先把蟹膏放進蟹蓋中蒸熟，蟹箝蟹腳用蒜頭辣椒炒香，這樣蟹膏就不會被猛火炒溶，而經秘製醬汁調味的粉絲，吸盡蟹的精華，相當惹味。另一推介籠仔荷葉蒜茸蝦蒸飯，白飯鋪上蒜茸和鮮蝦再蒸，飯粒軟硬度適中，沾滿荷葉的香氣和蝦的鮮味，無其他餸，都可以扒三碗！
賣相有要求
雖是住家菜，但Stella對賣相相當有要求，上湯蝦球釀節瓜把大蝦開邊，釀進相約闊度的節瓜中蒸熟，賣相絕不下於酒樓水準。別以為急凍蝦味道稍遜，全因上等的急凍蝦肉徹底解凍後，沒有雪味，肉質仲爽脆過浸過冰水的鮮蝦！叫得上門私房菜，最想吃到家的味道，檸檬蒸烏頭是住家菜代表，肉質肥美的烏頭配搭的檸檬非普通貨色，而是由Stella親手醃製的摩洛哥式檸檬，新鮮檸檬釀入海鹽再放入暖水中，醃製時間已超過一年，酸度適中相當開胃。雖然Stella愛煮工序繁複的中菜，但她會把西式煮法融入中式食材，好像蒜茸牛油田雞腿，田雞腿先炸再用蒜茸牛油快炒，食落啖啖肉！
記者評分（滿分★★★★★）
味道：★★★★☆
賣相：★★★囗
☆
上菜速度：★★★☆☆
價錢：★★★☆☆
總結：上門私房菜概念夠創新，有好嘢食又有家的感覺，啱晒忙碌的都市人。最讚係鮑魚，燜得入味又鮮甜，有大廚級水準！但最低消費$1,200，仲未包材料費，拍得住高級餐廳，略嫌貴咗啲！
誰家灶頭．上門私房菜（94014035）
服務收費：最少4位，最多12位。
每位$300（人工費），材料費另計。