曼城上季咁辛苦先贏到個英超冠軍返嚟，當然唔想畀佢停，喺新一季成功衞冕啦。佢哋就豪花20萬鎊（約240萬港元）去奧地利度假聖地進行季前集訓，聽落好似好正，查實慘到爆；事關班球員除咗唔畀帶女去同埋食零食外，晨早7點仲畀酒店附近嘅教堂鐘聲搞到冇覺好瞓。
每朝7點被「鐘」醒
曼城喺禮拜日飛去奧地利嘅度假聖地Seefeld進行季前集訓，住喺5星級酒店HotelKlosterbrau，會練到下個禮拜五即係20號，先至返英國。為咗呢次集訓，佢哋足足花咗成20萬鎊，而且喺3個月前就開始準備，幫球員訂咗價值1,000鎊嘅床褥同埋被鋪，等佢哋可以瞓個靚覺。不過，酒店附近嘅教堂每朝7點就敲鐘，搞到班球員冇覺好瞓。
曼城於是向教堂提出，希望可以遲1粒鐘先敲鐘，點知對方就唔賣佢哋賬。當地一個官員咁講：「佢哋想將敲鐘改成8點到10點，但係唔成功。」中場耶耶托尼就話：「我必須承認呢度喺夜晚真係幾熱，搞到我瞓得唔係咁好；希望喺熟習咗環境之後，可以有改善啦。」
生活清淡禁零食
冇覺好瞓都算，曼城班球員仲要除咗唔可以帶老婆同女友一齊嚟，仲唔可以食朱古力條等零食，亦唔准食煎炸嘢。好話唔好聽，呢啲億萬球星雖則住喺間靚酒店，不過身邊又冇女伴，又唔可以鍾意食乜就食乜，一啲都唔過癮，真係有紀律到要好似啲修士咁。酒店負責人薩寧表示：「曼城對食嘅要求好嚴格，啲嘢一定要新鮮同埋清淡，又要夠多蛋白質。」
不過，我求大俠見到曼城球員喺操練嘅表現，又似乎唔錯，個個都幾好精神，睇嚟冇畀鐘聲、禁慾同埋嘢食影響到。咁講真，老細花成兩百幾粒畀你去集訓，點都要擺個寬容樣出嚟啦！
超豪酒店一晚4千蚊
HotelKlosterbrau係位於海拔1千呎嘅奧地利度假聖地Seefeld，而呢間5星級酒店仲有500年歷史，前身係一間修道院。喺每年冬天，唔少富豪都嚟呢度玩冬季運動。話晒係高級酒店，啲房價一啲都唔平，普通雙人房每晚要成2千零蚊港紙，再靚啲去到3千零蚊到4千蚊都有。