女性朋友Grace上星期收到好多fbfriends嘅訊息，令到佢嘅iPhone應接不暇，大家飲茶時，佢一味睇住部電話，問佢做乜鬼，佢話：「唉吔，只因我個名係Grace，啲friends係咁傳明報一段新聞俾我，驚死我唔知，其實我都有睇娛樂版嘅，點會唔知吖。」好嘞，左丁山唔睇娛樂版嘅，真係唔知有乜事發生喎，Grace於是app過嚟，叫左丁山自己睇。
打開WhatsApp就睇到明報（七月五日）娛樂版，記者林祖傑嘅新加坡直擊報導，講述羅慧娟喪禮，儀式開始時，教堂播放（AMaySingGrace），現場氣氛傷感，親友均哭成淚人喎。
睇到呢度，已經知道呢位記者鬧出大笑話，第一時間俾讀者捉到錯處，立即在網上瘋傳。唉，邊度會有一首歌曲叫做AMaySingGrace㗎！梗係老牌到冇得再老嘅「奇異恩典」AmazingGrace啦，明報記者嘅寫法，簡直錯得莫名其妙。記者錯，編輯又會睇唔到？總之有時做新聞錯起嚟，好似有鬼掩眼。明報總編輯劉進圖係港大法律系高才生，英文一流，唔知駛唔駛為下屬開英文校對班呢？
Grace笑咗一大爛餐之後，因為拍檔放假，繼續忙於開工與政府公關周旋。上星期係梁振英政府上台第一個星期，意圖展開籃球戰術full-courtpress（全場人釘人），全體問責官員盡量外出落區及出席電台直接訪問節目，希望造勢，提升民望。可惜呀可惜，梁特首因家有僭建未報，未宣誓上任已經跣親，就職後跟住又有食衞局長高永文僭建，發展局局長麥齊光二十幾年前涉嫌呃租金津貼，俾傳媒狙擊到體無完膚，跟住曾俊華司長、陳家強局長又對梁特首之大計如建立港版淡馬錫基金大潑冷水，最搞笑嘅就係行政會議召集人林煥光竟然大玩唔嫁又嫁，唔知嫁唔嫁好，上任兩三日就夠膽話考慮辭職（如果在平機會與行政會議揀一份嘅話），離譜到極。喂，此人係林煥光喎，讀過好多書嘅喎，難道接受任命前竟然冇考慮周詳就接下一個在香港排名極高嘅職位？成班人好似玩泥沙，以後五年唔知點過。