33歲才女卓韻芝近年為求脫離剩女行列，不停集郵，先後交上法籍和德籍洋漢，食厭西餐，近日竟改吃爽口泡菜，撻着剛來港發展、貌似王力宏的30歲韓模宋斗煥（Song），二人前日相約到深水灣隊啤、踢沙、嬉水、睇日落，泡菜王力宏出四招冧爆負評芝。
新一代才女、商台DJ卓韻芝懶理網友負評，繼續我行我素，前日下午跟九名模錄影節目《罪該萬死卓韻芝》時，被眾女圍攏請食波餅，令她幾乎唞不過氣，工作後即人約黃昏後，與猛男相約深水灣隊啤行沙灘。
踢沙嬉水賞日落
阿芝早前周旋於德國金融才俊和法國男模之間，吃了半年西餐的她開始嫌膩，近日改嘆韓國菜，搭上剛來港發展、30歲貌似王力宏的韓模宋斗煥，二人前日閒坐沙灘談情，還嬉水作樂。
阿芝跟泡菜王力宏Song前後腳到達深水灣，他們會合後即往小賣亭選購冰凍啤酒，穿上白色情侶裝的阿芝先跟泡菜王力宏坐在樹蔭下雞啄唔斷。
大約半小時後，泡菜王力宏游說阿芝行沙灘睇日落，由於沙灘多泳客，二人最初比較避忌，只肩並肩行。之後阿芝漸漸放下戒心，索性提議齊脫下鞋襪赤腳踢沙兼嬉水，更坐下欣賞日落談情一小時，浪漫一輪便離開。阿芝邊單腳企邊用手抹去另一隻腳的沙時，泡菜王力宏醒目伸手拖着阿芝，令女方冧爆甜笑不停。
「真係鍾意韓國菜」
據知阿芝新歡泡菜王力宏Song是ModelGenesis旗下男模，身高6呎2，體形健碩。泡菜王力宏來港日子雖短，近日拍了滙豐銀行廣告，廣告張貼港鐵巨柱。
阿芝唔食西餐轉食韓菜，身為食家的她昨日在電話中抵死回應：「我想試吓唔同國家菜式，呢排又搵唔到好嘅中國餐館。」阿芝近日可是情迷泡菜，她喪笑說：「我真係鍾意食韓國菜㗎，不過你哋唔好搞佢（指Song）啦，佢啱啱嚟香港做嘢。」對於泡菜王力宏大獻殷勤扶實阿芝掃走腳底沙粒，她說：「咁黐嘛。」可有乘機黐埋一齊？阿芝即大叫救命尷尬迴避話題。
採訪、攝影：彭琮然、梁繼光
