【本報訊】被指為了做官而埋沒良心變臉的運輸及房屋局局長張炳良（圖）繼續受到抨擊，多名議員趁他出席立法會會議時質疑其政治誠信，而昔日曾一起爭取平反六四的民主黨前黨友更在席上高聲當面直斥他對六四立場轉軚，十分無恥。
六四問題待討論
張炳良昨首次以局長身份出席立法會交通事務委員會會議，介紹新一屆政府運輸政策。曾是民主黨成員的陳偉業在發問時乘機翻張炳良舊賬，指他90年代擔任民主黨副主席時曾許下的政治承諾，現不履行是背信棄義。「我形容你係政治菠蘿雞，邊度有利益就黐，梁振英委任你，你就黐梁振英，跟住連六四都唔記得咗，你咁嘅表現，領導一個局，令一個局聲譽掃地」。
張炳良一臉不悅地回答說，「大家政見唔同，我唔接受陳議員所講，話我背信棄義，六四問題，我到今天都冇忘記」。他又表示，六四問題留待其他場合再討論。
陳偉業隨即大聲駁斥：「你冇忘記六四？你公開講六四問題要綜合多方面去睇，同你以前講法有改變，張炳良，問吓你自己嘅良心！六四定位係點，要向公眾清楚交代。你唔記得六四，係政治無恥，張炳良！」
再遭陳淑莊暗寸
委員會主席張學明即時指陳偉業發言時間已完，點名下位議員公民黨陳淑莊發問，但陳淑莊在問運輸政策問題前卻仍暗寸張炳良：「歷史係自己性格或過去一部份，大是大非嘅事件，唔好忘記。」