蘋機會：SONY高招防水　濕Touch

炎炎夏日唱番首《Let'sgetwet》，頓時令人涼透心！不過今日主角唔係Chok王林峯，亦非一眾docomo防水機，而係SONY首部濕玩王Xperiago。常聽到嘅防水、防塵已成例行公事，佢勁在手濕都可玩輕觸芒，就算水珠鋪滿屏幕亦唔影響操作。想落水濕影、濕Send短訊，零阻隔！

記者：陳國輝
攝影：伍慶泉
Model：Wendy@澳洲新八模

水滴無阻輕觸操作

日系docomo手機起碼八成以上都防水，浸住長玩半粒鐘也不成問題。但呢批防水機亦有通病，就係一落水就即時失控，不單畫面會不停亂跳，甚至機面濕水會連打電話都有問題！不過，Xperiago特別加入濕手指觸控（WetFingerTracking）來解決呢個難題，例如你冲凉、洗碗或者游水嗰陣，話之你滿手水珠，只要用TouchScreen嗰陣，都能夠正常操作，點捽也不受干擾，甚至試過用虛擬QWERTY打短訊，輸入文字準繩度極高，完全Feel唔到手濕帶來嘅問題。
濕水玩固然方便，但諗住潛落水底就咪制！Xperiago支援IP67防水標準，意思係可放入15cm至1m深嘅水中達30分鐘，應付落雨天、浸浴還可，但帶佢落1m以上玩浮潛影相就唔得喇。

■池邊試玩，輕輕濕吓水絕無問題。

■Model手濕輸入「appledaily」，準確率100%。

■Armband採用魔術貼，戴上手臂或大髀都得。

■採用內置電池，減低入水風險。

■鏡頭有個凹位，好易積水影響對焦。

戴Armband玩運動Apps

好多人唔Like防水機嗰份粗獷形象，又膠又大件。Xperiago較優勝係其簡約設計，四四方方斯斯文文，機身厚度僅9.8mm，不足1cm，重量亦只有110g，又輕又細件；同時佢仲玩上勁Sharp嘅黃色，也有黑、白兩隻大路顏色可供選擇，唔怕悶親。值得一提係，呢款機另提供運動型套裝，加$200就有齊Armband、運動型耳機以及腕帶等配件，啱晒鍾意踩單車同埋跑步嘅玩家；當然，此機本身也內置《FigureRunning》、《miCoach》等運動程式，幫你設計好運動時間表，搭埋戶外配件嚟KeepFit，正晒！