家模氾濫，波來波往，新面孔多不勝數，古靈精怪嘅商台DJ卓韻芝同余迪偉，噚日去到銅鑼灣為佢哋嘅節目《罪該萬死卓韻芝》進行拍攝，阿芝自誇可以憑身材逐一認出在場嘅新8模。
笑到胸都震
認人時阿芝乘機肆意研究眾模嘅胸形同大細，經過一大輪研究，最後阿芝只係勉強認得三位模。化身聖女嘅阿芝事後要接受大懲罰，被新8模請食波餅，最終阿芝被淹沒喺波濤洶湧之中，被胸壓嘅阿芝仲話要為此祈禱贖罪。
一向搞鬼嘅阿芝話，要嘗試以胸形嚟記憶模嘅名字，當然最終測試失敗，問到點可以令模備受注視，阿芝話：「我俾佢哋衝擊完，感覺毛骨悚然，頭先咁多肉撞埋嚟真係好驚。不過作為女仔最緊要識笑，佢哋笑到胸震時，feel到佢哋嗰種震撼力，令個胸有生氣。」
新8模嘅師姐媽模Mia亦有到場支持，Mia話嚟自澳洲嘅新8模質素好高，同佢一樣叫Mia嘅師妹更有台灣名模嘅風範，Mia話：「新人要睇多啲唔同嘅外國雜誌，多啲學吓點樣擺甫士，從中慢慢改進。」
場地提供：LAMODSalon&HairSPA