海迪因工作關係到歐洲公幹兩個多星期，有得親身感受下歐債危機。在德國和當地人傾偈，他們都說今年大減價提早了至少一個禮拜，2歐元、3歐元一件衫都有，好誇張。雖然德國經濟仲OK，但感覺佢哋對前景好保守，對價格敏感度亦高。
搭高鐵時和三個德國人搭訕，當地人已經覺得，歐元區遲早會散，甚至有啲支持佢散，認為將mentality完全唔同嘅國家綑綁埋一齊，一開始就已經係錯。一名任職人事顧問、家有兩個小朋友嘅Denial同海迪講，歐債問題完全係無止盡（endless），佢已經開始擔心自己嘅儲蓄（歐元）唔知點算好。
海迪之後去到意大利、法國，情況其實都差唔多，有朋友去希臘工作遭搶劫。聽歐洲朋友話，當地失業率20%至30%，呢幾年大量借希臘作踏腳石進入歐元區的新移民，已經長期失業兩、三年，最後都只好鋌而走險，做非法勾當。期望歐元區大佬可以成功刺激經濟增長，真係談何容易。雖然歐洲唔好景，但海迪一返來香港，更覺烏煙瘴氣，令人難受。
海迪