日本中場香川真司正式接替南韓中場朴智星，成為曼聯嘅一分子。「三肺星」雖則冇得再做紅魔，「降呢」轉投昆士柏流浪（QPR），不過前途一樣咁光明；事關佢新老細曉士好睇重佢，諗住委任佢為QPR嘅隊長，等佢做大佬睇住班細。
「佢想做隊長就有機會」
31歲嘅朴智星喺禮拜一正式結束喺奧脫福嘅7年旅程，落實以500萬鎊轉投QPR，並且簽約兩年。QPR領隊曉士就講明，「三肺星」係佢手上一粒好重要嘅棋子，仲計劃用佢嚟頂要坐12場波監嘅祖爾巴頓，坐埋對方個大佬位㖭；曉士話：「我敢肯定大家都想成為新隊長。朴智星係人選之一，只要佢想做，就一定有呢個機會。除咗佢，我哋仲有其他有豐富經驗嘅人選，就好似係贏過歐聯嘅施斯。」
曉士又大讚朴智星：「朴智星係個好有動力嘅球員，事關佢覺得眼前仲有成功等緊佢，所以佢肯定可以令QPR向前。上季季尾我話，唔想喺新球季再係咁（英超排第17位）；我相信，我哋喺新球季可以打上高啲嘅位置。」
朴智星喺未退出南韓國家隊之前，就曾以隊長身份帶領太極虎踢南非世盃決賽周，真係夠晒「哥利」做英超中小型球會嘅隊長；如果曉士真係搵佢做QPR嘅大佬，相信羅拔格連、安祖莊臣、賴恩尼爾遜同埋施斯等年過30嘅新舊球員，都會心服口服。至於朴智星亦俾前曼聯隊友里奧費迪南大讚：「唔可以同朴智星再做隊友，我真係好傷心。佢從來唔惹麻煩同肯無私奉獻，絕對係球員嘅榜樣。」
香川周二赴英接星仔棒
有出自然有入，朴智星喺禮拜一離開曼聯，23歲嘅香川真司就喺禮拜二由日本出發去英國，正式做紅魔。呢個將會穿起曼聯26號波衫嘅日本國腳話：「去踢英超對我嚟講係一次大挑戰，不過我對自己好有信心。」我求大俠希望香川佢可以好似朴智星咁成功啦！
