唔好以為歐債危機淨係搞冧金融業，就連足球員都難逃荷包縮水一劫！根據國際足協「轉會系統」數據顯示，今年上半年，球員轉會至其他國家球會數目下跌9%至4973次，所涉及轉會費更大減34%，只係得5.76億美元。
國際足協發言人就話，相信數目下跌係因為經濟衰退，加埋歐洲足協新實施「財務公平競爭規則」所造成。不過佢強調，要觀察埋7至8月歐洲轉會市場重開之後嘅情況，先可以下判斷。
「財務公平競爭規則」嘅實施，主要係確保球會係用現錢簽球星，而唔係充大頭，由班主借錢簽個天價球星番嚟，令球會資不抵債情況更嚴重。呢個情況下，球員身價大跌好合理。環球經濟危危乎，連球會班主都自身難保，仲邊會有閒情大灑金錢喺球會度，唔通真係「不愛江山愛足球」咩？星級球員身價「蔗渣」化，唔知仲可唔可以踢出「燒鵝髀味道」嘅水平呢？