男人經常投訴唔明女人諗乜，話女人口不對心，其實上市公司管理層何嘗唔係咁？已經唔提「盈警」變「盈喜」呢類極端案例，即使CEO對投資者講嘅每一粒字，都係諗過度過，務求大事化小、小事化無。《華爾街日報》旗下網站MarketWatch最近訪問咗一啲基金經理，嘗試為投資者破解公司高層「用字密碼」。
經常聽到高層形容公司「面對不明朗因素」，齋聽以為公司只係面對小問題，死唔去嘅，但基金經理就篤爆，呢句說話嘅潛台詞係「唔使望今季有好表現，公司表現放慢緊」。當高層講明「前景富挑戰性」時，咁就大件事，言下之意係「競爭激烈，就快俾對手打殘」。
甜言蜜語有邊個唔鍾意聽？但得一時，唔到一世，倒不如一早就老實一啲，至少保住市場信任。