醫管局想話輸入海外醫生,解決公立醫院醫生不足問題,但聘用海外醫生之前,必須醫學委員會批准,而醫委會會員(本地醫生為主)最唔高興輸入海外醫生。新科局長高永文醫生如要解決低下階層到公立醫院睇醫生排長龍之怨氣,必須正視公立醫院醫生不足問題,從速制訂短期長期解決方案。講堅尼系數太抽象,低下階層根本不懂,亦唔理會,但每日到公立醫院排隊,就立即知道貧富懸殊為何物。高永文本身係骨科專家,佢應該知道有錢人去德成大廈搵骨科專家與窮人到威爾斯醫院輪籌睇骨科嘅時間分別。
一位女讀者C來電郵申訴,佢阿媽思想行為怪異已有十年八載,自覺無病,最近與弟弟設法帶媽咪到威院急症室,醫生診斷媽咪患上妄想症,留醫一個月,未好就要出院,原因簡單到極,醫院唔夠病房床位,而媽咪沒有即時危險!返到屋企之後,媽咪怪異行為令到父親衝動失常,打爆大門,讀者C打電話到大埔醫院、大埔那打素醫院搵精神科醫生,全部冇回音──熱線接線生話:「有一日上了報紙頭版,才能處理呢個Case!」女讀者C話:
「看着家母愈來愈顛,亦發現家父開始發顛,我坐以待斃,既無奈又憤怒。政府面對醫生不足,應有其他應對方法呀:
1增加公眾/家屬照顧課程;2增加精神科熱線輔導員的人數熱誠;3增加警察對精神病人的了解和有強制入院的權力;4最重要是輸入精神科醫生」
唉,香港點只需要輸入精神科醫生吖,乜嘢專科醫生都唔夠,假如梁振英政府真係要學習新加坡,以新加坡為師嘅話,唔該梁振英、高永文立即行動,去新加坡取經,制訂一份世界排名最高嘅大學醫學院名單,例如前列一百名嘅醫學院畢業生具備三至五年醫院醫生經驗者,即可免試來港在公立醫院就任醫生職位,香港永久居民子女優先聘用。香港黃金50(HKGolden50)對醫生不足,輸入醫生嘅議題,有出咗研究報告,上網可以搵到,黃金五十創辦人林奮強啱啱成為行政會議成員,佢可唔可能推動吓?