新加坡總理李顯龍今年雖然減薪，但支取年薪一百七十萬美元，仍然係世界上最高薪政治領袖。排第二名嘅，嘻嘻，我地香港好有面，就係香港特別行政區特首，雖然梁先生只係得五十幾萬美元啫；世界上目前最有影響力嘅德國總理默克爾夫人排第八，美國總統奧巴馬排第五之嗎！
梁特首家居香港山頂豪宅，時值億億聲（不計僭建面積），身家豐厚，全球十大高薪領袖之中，梁先生隨時係第一名最高資產淨值，香港之光也。上一任特首連間似樣啲嘅大豪宅都冇，退休後暫時「無家可歸」，與梁先生邊度有得比！
既然特首與問責高官都咁好收入，一日到黑講扶貧，講貧富懸殊，唔該佢地做啲嘢啦。食物及衞生局局長高永文醫生原來好有錢，住在畢架山一號頂層連天台豪宅（兩單位未經批准就打通合而為一，二千幾呎大單位），希望佢知道，窮人與有錢人之間，最大分別不在乎出入有名車，食有鮑魚，左丁山兒童時代瞓板間房好窄冷巷碌架床，吃斗令、一毫嘅雞尾包，不以為苦，但有次阿媽有病，陪佢去九龍醫院輪街症，天寒地凍之下排隊輪籌個幾鐘頭，自己冇病變咗傷風咳，就認真羨慕班上一位同學（我間學校係商會主辦，同學爸爸係商會監事長）一有病就行入私人醫生診所，好快就執齊藥行番出嚟，嗰陣時呀，就真真正正覺得大家有貧富差距。我爸爸係賺唔到錢嘅窮爸爸，醫療差距（medicaldivide）好易令人產生不公平、厭富嘅感覺，現代社會講公義，必須擺醫療與教育在第一位優先。
香港嘅公共醫療確係搞得幾好，故此香港嬰兒夭折率差不多係世界最低，人均壽命差不多係世界最長，但目前公立醫院醫生不足，護士不足，普通人，貧窮階層去公立醫院睇醫生，排隊排長龍嘅局面歷久不變，且有惡化趨勢。七月五日「明報」就報導威院急症輪候時間不達標，骨折病人等醫生要等兩小時以上，頸傷中學生苦等8小時。有錢病人當然行入中建大廈萬邦行就可以得到充份照顧，此乃香港最大之貧富懸殊現象，最容易令人產生憎人富貴嘅感覺，政府必須正視之！