八歲可以做乜？相信香港的小朋友，大多在畫班、補習班上呆坐；不過剛抵港的羅馬尼亞體操神童Giuliano，四歲開始就不斷打破健力士世界紀錄；今年八歲，就練得滿身肌肉配六嚿腹肌，單槓、指上壓係強項，連體操國家隊都向佢招攬；你都覺得生番個Giuliano乜仇都報晒？咁你就要睇睇體操神童是怎煉成的！
記者：張文蕙
攝影：楊錦文、林栢鈞
鳴謝：東港城（27039346）
羅馬尼亞一向係體操強國！2000年悉尼奧運，該國體操選手就獲得了女子全能體操金牌，另外兩名選手亦分別獲得體操項目的銀牌和銅牌；須知由一個國家囊括前三名獎項，在體操史上極罕見！對上一次已是1960年的蘇聯體操隊締造此佳績。
自發挑戰 由得佢啦
Giuliano嘅「力王神績」，由四歲開始！當時佢喺電視節目上表演，以雙腳夾住個足球倒立行，24秒完成10米，從此開始打入健力士世界紀錄大全。其後他又以二十次騰空掌上壓、人形旗幟，及於四個酒瓶上做出八次掌上壓打破世界紀錄。
身兼健身教練嘅老竇Iulian話：「初時希望佢打Boxing，後來發現兩歲嘅佢，竟然自己識倒立行；原來佢模仿了我平日動態，見他喜歡便開始從簡單動作訓練。在羅馬尼亞，體操是普遍的活動，很多家長希望子女成材而送佢哋去訓練營，裏面會打罵學生，十分嚴苛！我反對這種令小朋友失去童年的教育！我唔會嚴格要求佢做些甚麼，相反佢同細佬Claudio都好自發地挑戰自我，日子有功便有今日成績！」
練習體操 增專注力
Iulian：「練習體操後，他們的專注力更強，例如數學很早已懂得由1數至1,000。」小記現場也留意到，無論訪問及表演，Giuliano與Claudio都很自律，絕不亂跑亂跳。
「我們經常有快樂的家庭聚會，輕鬆地玩餐飽！這樣他們感覺家人在支持，便更有力量去挑戰！」
Giuliano本身亦好享受成功的喜悅！表演前在後台已望着獎盃問：「佢係咪將會屬於我㗎？」Giuliano非常珍惜每一次努力成果！難怪每次表演後，佢都舉起一隻手指，這代表了他要一直成為世界第一！搞笑係細佬Claudio每次都跟住大佬做，咁邊個先係第一呀？
力王推介：初階鍛煉動作！
戒食炸物練靚肌肉
Giuliano無論做倒立行走、單槓翻騰都易過借火！在一個翻騰動作中，腹部露出有如一排朱古力的腹肌，令現場嘅女學生們高聲尖叫！要Keep到咁嘅肌肉身型，膳食要求會好嚴格？「平日會多吃蛋白質，但唔會刻意谷！每一種食物都唔可以過量，油炸食物會盡量避免。」
問到Iulian對兩個仔仔有乜期望：「期望他們能在有興趣、做得快樂的事情上，取得了成就，成為有用的人。羅馬尼亞與希臘國家隊都有來找過Giuliano，現時我還在比較那方待遇較理想。」
Giuliano戰績
