世事如棋局局新，早前被本報娛樂版影到同模Emily爆房、通街食煙，搞到失戀又失業嘅陳肇麒；兩個月唔夠，唔單止同正印女友Toby成功箍煲，據聞仲「升呢」登陸中甲加盟廣東日之泉，呢次真係奇人奇事，估佢唔到囉！
簽日之泉要多謝高梵
港甲唞暑期間，陳七唔知係咪知道班球迷餓波悶得滯，今日將透過bma公關召開記者會，向大家交代自己最新去向。我求大俠收到風，呢位5月尾俾南華解約後一直潛水嘅前香港足球先生，將會加盟廣東日之泉，同前南華隊友梁振邦再做隊友。據了解，現時喺中甲排11位嘅日之泉，一直都想簽前鋒，以增強攻力；前天水圍飛馬前鋒高梵同陳七，都係教練曹陽嘅目標人物，點知「埋門一腳」被中超嘅河南建業攔途截劫咗高梵，咁咪順理成章羅致陳七囉。
估計陳七今次「升呢」投日之泉，月薪都有成3、4萬人仔，而強國嘅夜生活又咁多姿多采，希望嚟緊禮拜六就27歲嘅七哥，可以修心養性啦。咁啱日之泉下場比賽就喺周六作客重慶FC，唔知佢到時可以落場未呢？
講到重新起步，陳七嘅舊東家南華，經歷上季四大皆空後，噚日都喺南華會「神秘」開操。事關球會話今次係非正式開操，要閉門操練，所以唔開放畀傳媒採訪；一大早就請班記者行家食閉門羮，真係史無前例。但為咗捍衞新聞自由，一眾體記決定堅持到底，不惜喺「門常關」嘅閘門罅、擔梯喺閘門頂，甚至走上南華天台吧影相；即使被保安大哥驅趕，都要睇吓呢支「神秘之師」搞邊科。
羅神Blog透露簽兩巴西兵
唔睇唔知，除咗伊達未歸隊，李康廉、積施利、陸志豪同陳湛羲等新兵都已經報到；舊援祖爾就暫未歸隊。閉門練咗個半鐘後，頂替高世安嘅新帥廖俊輝又封嘴，只有隊長陳偉豪大方回應傳媒提問︰「我哋今（噚）日係唔齊人㗎，主要郁吓出身汗，所以今次閉門操練，我哋好秘密㗎。」佢又透露，球隊將會喺開「咧」前去東南亞集訓。少林寺將於下周二（17日）正式開操。
羅傑承昨晚在球會網頁透露，如上季般透過助教祖利亞，前赴巴西搵新援；今次覓得兩位巴西新援，一是中場狄卡奧，另一為前鋒李安杜。李安杜（LeandroRodrigues），身高1米87，頭槌及腳法皆了得，曾效力瑞典球隊卡爾馬；至於狄卡奧（CarlosAugusto），身高1米74，踢法及能力與上季效力過的利馬相似，而且經驗較豐富。
廣東日之泉知多啲
廣東日之泉成立於2007年，隊內大部份球員都來自廣東省，主教練曹陽亦為廣東人，故粵語成了隊中「官方語言」，球隊還背負着重振廣東足球的包袱。
日之泉在08球季，以中乙第2名的成績升上中甲，而過去3季在中甲成績尚算不俗，分排在第5、11及3位。惟今季戰績平平，開季不久便與塞爾維亞教練可可托維奇（DraganKokotovic）解約，由原任教練曹陽重掌帥印；目前落後榜首的上海特萊士17分，排在下游的第11位。