【本報訊】03年沙士襲港後，港人對被指病毒源頭的野味耍手擰頭，但《蘋果》記者在廣州多個市場發現，沉寂九年的野味市道再度蓬勃；有港人專程北上購買野味及受國家保護的野生動物返港，除可能會將沙士再度從廣州帶到香港外，還會惹上官非。
記者：林熊、司徒韋桐
炎炎夏日，以出售野味聞名的廣州清平市場，興旺程度竟不遜秋冬。除擺賣一般毒蛇、水鳥外，還有受國家二級保護的野生娃娃魚、錦雞及夜鷺等。近年不少港人已淡忘沙士事件，無分時令地到廣州購買野味進補，連被指沙士元凶的果子貍都照食，甚至偷運返港。
「出得起錢乜都有得食」
「我做野味30幾年，喺廣州我認第二，無人敢認第一。」年約50歲的錢仕軍自認廣州野味大王，估計經他出售的野味數以萬計，品種亦達百種。《蘋果》記者找上他檔口，假意問「有冇好嘢」，錢仕軍打量一番後說：「睇你似香港人喎，本地人唔會咁問㗎。」
確認記者是港人，錢反而放心笑說：「你想食乜，我就會幫你搵乜，你放心！全部都係野生嘅，唔係野生嘅賣畀你都冇乜意思。」講到野味來源，人稱「軍哥」的錢仕軍神氣地說：「你係香港人先講咋，呢啲嘢（野生動物）主要喺廣西和湖南搵，出得起錢，乜都有得你食啦！」
軍哥透露，近年很多港人專程到廣州購買野味，當中娃娃魚、夜遊鶴及錦雞最受歡迎。「我好多熟客係香港人，佢哋食完仲會帶返香港，我通常會幫佢劏乾淨後拖水（用滾水淥一淥），再用少少冰打包，放入背囊拎過關。大陸海關唔查，香港海關就算截查，只要係熟就冇事。」
錢仕軍極力推介野生娃娃魚及夜遊鶴，「娃娃魚850蚊一斤，每條8斤左右，你食完就知效果，好補㗎！」他續說：「你可以嚟睇住我劏，我又可以帶你去相熟酒樓加工，再唔係拖水畀你帶返香港都得㗎！」其後他又力推毒蛇「過山峯」燜夜遊鶴、穿山甲、果子貍，以至貓頭鷹等。
記者指販賣國家保護動物是犯法時，軍哥不屑說：「冇人叫你擺出來賣㗎，梗係收埋。賣毒品夠打靶啦，咪一樣有人做。」
