麗豐（1125）超級大落後，趁住呢期內房郁郁吓，。麗豐呢期供完股，斷估短期內都唔會伸手，而集團每股供股價0.125元，現價（0.143元）唔係差好遠。又麗豐連供股攤薄後，每股NAV都挨近0.63元，現價係大幅度折讓77.5%，同磅數內房股，麗豐呢個折讓，流晒口水。再講，呢次供股，集團股東豐德麗（571）包銷，持股量由供股前40.58%，增加到47.39%，喺市場信心低劣期時，大股東真金白銀投麗豐信心一票。而祖國減息期開始，隨住阿爺一路寬鬆，為資產升值潮鋪好條路，麗豐一樣受惠，麗豐家陣鹹豆價，仲唔抵執？呢期唔少內房已彈起，兼創埋一年新高，麗豐仲未郁，搞落後，亦有得諗。現價翻半番到0.21元，麗豐折讓仍高達66%。
震雄底厚炒短線
震雄（057）啱公佈咗2012年度業績，連埋2011年度有特殊性收益影響，純利倒退咗五成。但要咁睇，震雄手頭淨現金6.85億銀，作風又一向穩健，有好基根，加埋阿爺呢期加快鬆手，集團絕對有能力渡過呢潮橫風橫雨期，兼享受中線祖國嘅增長。呢次吼住兩蚊邊位，先整轉短線，博升三成到2.6元，震雄亦未有耐上到NAV4.5元。
錢雋